भातकुली तालुक्यात एका ग्रामपंचायतीसह ४२ सदस्य अविरोध

टाकरखेडा संभू : भातकुली तालुक्यातील हातखेडा ग्रामपंचायतीसह तालुक्यातील ४२ सदस्य अविरोध निवडून आले आहेत. त्यामुळे आता २६९ जागांकरिता ६५६ उमेदवार भाग्य आजमावणार आहेत. एका जागेकरिता मात्र अर्जच दाखल न झाल्याने तेथील जागा रिक्त राहणार आहे.

भातकुली तालुक्यात ३६ ग्रामपंचायतींमध्ये असलेल्या ३१२ जागांकरिता निवडणूक लागली. २३ ते ३० डिसेेंबर दरम्यान ७७३ नामांकन दाखल झाले होते. यापैकी पाच अर्ज अवैध ठरले, तर ४ जानेवारीला अर्ज मागे घेण्याच्या शेवटच्या दिवशी ७० उमेदवारांनी माघार घेतली. यामुळे सात सदस्यीय हातखेडा ग्रामपंचायतीत सहा सदस्य अविरोध निव़डून आले. अनुसूचित जमाती महीला प्रवर्गातील एकही अर्ज दाखल न झाल्याने एक जागा रिक्त राहणार आहे.

तालुक्यातील ४२ उमेदवार अविरोध निवडून आल्याने आता २६९ जागांकरिता येत्या १५ जानेवारीला रिंगणात असलेले ६५६ उमेदवार भाग्य आजमावणार आहेत. याकरिता प्रशासन सज्ज झाले आहे. कोविडच्या पार्श्वभूमीवर मतदान केंद्रांवर उपाययोजना केल्या जात आहेत. एका उमेदवारांसह केवळ पाच जणांनाच प्रचाराची मुभा आहे.