३०० कोटी वर्षिक नियोजन निधी

अमरावती : जिल्हा वार्षिक योजनेत जिल्ह्यासाठी ३०० कोटी निधीची तरतूद करण्यात आली आहे. राज्याचे उपमुख्यमंत्री अजित पवार यांच्या अध्यक्षतेखालील सोमवारी पार पडलेल्या बैठकीत हा निर्णय घेण्यात आला आहे.

नियोजन भवनात सन २०२१-२२ या वर्षासाठी जिल्हा नियोजनच्या प्रारूप आराखड्याबाबत बैठक घेण्यात आली. यावेळी ते बोलत होते. बैठकीला पालकमंत्री यशोमती ठाकूर, शिक्षण राज्यमंत्री बच्चू कडू, झेडपी अध्यक्ष बबलू देशमुख, नियोजनचे अपर मुख्य सचिव देबाशिष चक्रवर्ती, विभागीय आयुक्त पियूष सिंह, तसेच विभागातील लोकप्रतिनिधी, जिल्हाधिकारी व अधिकारी उपस्थित होते.

जिल्ह्यातील विविध नियोजित कामांबाबत जिल्हाधिकारी शैलेश नवाल यांनी सादरीकरण केले. नियोजनासाठीचा निधी २८५ कोटी रूपयांवरून ३०० कोटी रूपयांपर्यंत वाढवून मिळण्याची मागणी पालकमंत्री यशोमती ठाकूर व विविध लोकप्रतिनिधींनी केली, त्याला मान्यता दिली गेली.

बॉक्स

ही होणार वैशिष्ट्यपूर्ण कामे

जिल्ह्यात जिल्हा वार्षिक योजनतून प्राथमिक आरोग्य केंद्राचे बळकटीकरण, पांदणरस्त्यांसाठी विशेष मॉडेल, ‘माझी वसुंधरा’मध्ये सौर ऊर्जा यंत्रणा, आमझरी येथे ‘मँगो व्हिलेज’, संत गाडगेबाबा निर्वाणभूमी वलगाव येथे जिल्ह्यातील प्राचीन, ऐतिहासिक बाबींची माहिती देणारे प्रदर्शन व संग्रहालय उभारण्यात येणार आहे. राष्ट्रसंत तुकडोजी महाराज, वैराग्यमूर्ती संत गाडगेबाबा, डॉ. पंजाबराव देशमुख यांचे जीवनचरित्र नव्या पिढीपर्यंत पोहोचावे यासाठी जेजे स्कूल ऑफ आर्टस्कडून विशेष प्रकल्प उभारण्यात येणार आहे. जिल्ह्यातील जलप्रकल्प व तेथील नैसर्गिक संपदा लक्षात घेता ‘इनलँड वॉटर टुरिझम’वर भर देण्यात येईल. जिल्ह्यात गारमेंट हब निर्माण करण्याचेही नियोजन आहे.