२०७६ विद्यार्थ्यांना मिळणार खासगी शाळेत मोफत प्रवेश

अमरावती: आर्थिक व दुर्बल घटकातील बालकांना आरटीई अंतर्गत २५ टक्के कोट्यातून जिल्ह्यातील खासगी नामांकित शाळेत प्रवेश देण्यात येणार आहे. यासाठी जिल्ह्यातील २४४ शाळांची ऑनलाइन नोंदणी केली आहे. जिल्हाभरात २ हजार ७६ मुलांना प्रवेश मिळणार आहे. यासाठीची ऑनलाइन अर्ज प्रक्रिया बुधवारपासून सुरू झाली असून, २१ मार्चपर्यत ती चालणार आहे.

आर्थिक व दुर्बल घटकातील बालकांना उच्च शिक्षण देण्याच्या उद्देशाने शासनाने २००९ च्या शिक्षण हक्क कायद्यानुसार नामांकित शाळेत २५ टक्के बालकांना मोफत शिक्षण देण्याची तरतूद आहे. २०२०-२१ या शैक्षणिक सत्रासाठी ऑनलाइन प्रवेश प्रक्रिया राबविण्यात येणार आहे. यासाठी मागील आठवड्यापर्यंत शाळांचे ऑनलाइन नोंदणी प्रक्रिया पूर्ण करण्यात आली होती. त्यानंतर प्राथमिक शिक्षण संचालनालयाने आरटीई प्रवेशासाठीचे ऑनलाइन प्रवेश अर्जाची प्रक्रिया सुरू करण्यात येत असल्याचे जाहीर केले होते. त्यानुसार जिल्ह्यात आरटीई प्रवेश प्रक्रियेच्या अर्ज भरण्याच्या प्रक्रियेची लगबग सुरू झाली आहे.

बॉक्स

एकच निघणार सोडत

नव्या शैक्षणिक सत्राकरिता आरटीई अंतर्गत २५ टक्के राखीव जागांवर प्रवेश प्रक्रियेसाठी तीन टप्पे ऐवजी एकाच टप्प्यात राज्य स्तरावर लॉटरी काढली जाणार आहे. या सोडतीत पात्र ठरलेल्या पाल्याची प्रवेश प्रक्रिया सुरू झाल्यानंतर दिलेल्या मुदतीत आरटीई अंतर्गत संबंधित पाल्याचे प्रवेश निश्चित न केल्यास पुढे रिक्त राहणाऱ्या जागांवर प्रतीक्षा यादीतील पाल्यांना प्रवेशाची संधी मिळू शकणार आहे.

बॉक्स

बॉक्स

जिल्ह्यातील उपलब्ध जागा

अचलपूर १७२, अमरावती २७४, अंजनगाव सुर्जी १०३,भातकुली ६५,चांदूर बाजार १०९,चिखलदरा ५,चांदूर रेल्वे ४६,दयार्पूर १३७,धारणी १८,धामणगाव रेल्वे ८५,मोशी १४९, नांदगाव खंडेश्र्वर ४७,तिवसा ५४,वरूड १५५,अमरावती महापालिका क्षेत्र ६५७ अशा २०७६ जागांवर आरटीई २५ टक्के प्रवेशासाठी अर्ज करता येणार आहेत.