वाई, शहापूर प्रकल्पाच्या भूसंपादन व पुनर्वसनाची कामे तातडीने करा!

विभागीय आयुक्तांचे निर्देश; प्रकल्पांच्या कामांचा घेतला आढावा.

अकोला : मूर्तिजापूर तालुक्यातील वाई व आकोट तालुक्यातील शहापूर प्रकल्पाची कामे तातडीने मार्गी लावण्यासाठी या दोन्ही प्रकल्पांतर्गत भूसंपादन व पुनर्वसनाची कामे तातडीने मार्गी लागवण्याचे निर्देश विभागीय आयुक्त ज्ञानेश्‍वर राजूरकर यांनी मंगळवारी संबंधित अधिकार्‍यांना दिले. या प्रकल्पांचा आढावा घेण्यासाठी त्यांनी जिल्हाधिकारी कार्यालयात बैठक बोलाविली होती. विदर्भातील सिंचन प्रकल्पांची कामे तातडीने पूर्ण करण्यासाठी मुख्यमंत्री देवेंद्र फडणवीस यांनी सनियंत्रण कक्ष सुरू केला आहे. त्यामध्ये अमरावती विभागातील १0 प्रकल्पांचा समावेश आहे. या १0 प्रकल्पांमध्ये अकोला जिल्हय़ातील वाई आणि शहापूर या प्रकल्पांचा समावेश आहे. या दोन्ही प्रकल्पांचा समावेश वॉररूम (युद्धपा तळीवर) मध्ये केला आहे. त्यामुळे या दोन्ही प्रकल्पांची कामे तातडीने पूर्ण करण्याचे मुख्यमंत्र्यांचे निर्देश आहे त. त्याअनुषंगाने विभागीय आयुक्तांनी मंगळवारी जिल्हाधिकारी कार्यालयातील लोकशाही सभागृहात आढावा बैठक घेतली. यावेळी जिल्हाधिकारी जी. श्रीकांत, सहायक आयुक्त ओ.आर. अग्रवाल, भूसंपादन अधिकारी शरद पाटील, मिलिंद शेगावकर, उपविभागीय अधिकारी संजय खडसे, शैलेश हिंगे, गजानन निपाणे यांच्यासह अकोला पाटबंधारे विभागाचे अधिकारी, भूमी अभिलेख विभागाचे अधिकारी उपस्थित होते. वाई व शहापूर प्रकल्पाच्या भूसंपादनासह पुनर्वसनाची कामे तातडीने पूर्ण करण्याच्या सूचना त्यांनी अधिकार्‍यांना केल्या. वाई प्रकल्पातील पुनर्वसित गाव खरप नवले या गावाचा पुनर्वसन आराखडा मंजूर असून, नागरी सुविधांना मान्यता देण्यात आली आहे. सदर प्रकल्पाचे काम त्वरित करावे,असे निर्देश विभागीय आयुक्तांनी दिले. याशिवाय जिल्ह्यातील इतर सिंचन प्रकल्पांच्या कामाचा आढावाही त्यांनी घेतला.

*मुख्यमंत्री घेणार ५ ऑगस्टला आढावा

         विदर्भातील सिंचन प्रकल्पांसाठी मुख्यमंत्र्यांनी सनियंत्रण कक्ष स्थापन केला आहे. या कक्षाअंतर्गत समावेश करण्यात आलेल्या प्रकल्पांच्या कामांचा आढावा खुद्द मुख्यमंत्रीच ५ ऑगस्ट रोजी व्हिडिओ कॉन्फरन्सद्वारे घेणार आहेत. यापूर्वी १0 जुलै रोजी मुख्यमंत्र्यांच्या सचिवांनी या प्रकल्पांच्या कामांचा आढावा घेतला होता. शुक्रवार, १७ जुलै रोजी ते पुन्हा या कामांचा आढावा घेणार आहेत. त्यानंतर मुख्यमंत्री आढावा घेणार असल्याची माहिती विभागीय आयुक्तांनी दिली.