अठरा एड्सग्रस्त जोडप्यांचा फुलला संसार

एड्स म्हणजे मृत्यूचा सापळा. या सापळ्यात अडकलेल्यांच्या जीवनात विवाह लावून जगण्याची उमेद निर्माण करण्याचे कार्य एड्सग्रस्तांनी एड्सग्रस्तांसाठी उभारलेली एनएपी संस्था करीत आहे.

अकोला : एड्स म्हणजे मृत्यूचा सापळा. या सापळ्यात अडकलेल्यांच्या जीवनात विवाह लावून जगण्याची उमेद निर्माण करण्याचे कार्य एड्सग्रस्तांनी एड्सग्रस्तांसाठी उभारलेली एनएपी संस्था करीत आहे. या संस्थेने आतापर्यंत १८ एड्सग्रस्त जोडप्यांचे विवाह लावून त्यांचे संसार सुरू करून दिले आहेत.
एड्सग्रस्तांच्या समस्या सोडविण्यासाठी, त्यांना मानसिक आधार देण्यासाठी एड्सग्रस्त असलेल्या काही तरुणांनी अकोल्यात एनएपी, नेटवर्क ऑफ अकोला बाय पीपल लिव्हिंग विथ एचआयव्ही ही संस्था २००७ साली सुरू केली. तेव्हापासून या संस्थेच्या माध्यमातून एड्सग्रस्तांच्या मदतीसाठी विविध उपक्रम राबविण्यात येतात. यातील विशेष उपक्रम म्हणजे विवाह लावण्याचा. समाजाचा एड्सग्रस्तांकडे पाहण्याचा दृष्टिकोन हीनत्वाचा आहे. अशा एड्सग्रस्तांशी विवाह कोण करणार? असा प्रश्न निर्माण होतो. त्यामुळे एनएपी संस्थेने त्यांच्या विवाह लावून संसार सुरू करण्याचा उपक्रम सुरू केला. संस्थेकडे जिल्ह्यातील ७० टक्के एड्सग्रस्तांची माहिती आहे. त्यांनी विवाह रजिस्टर तयार केले असून, त्यामध्ये विवाहयोग्य एड्सग्रस्तांची नावे, माहिती व परिचय पत्र गोळा केले आहेत. विवाह योग्य पुरुष व महिलेचा विवाह वयाचा आधार घेऊन लावून देण्यात येतो. विवाह लावताना जात, धर्म, पंथ, श्रीमंती, गरिबी याचा भेद केल्या जात नाही. संसर्गित लोकांमध्ये पती किंवा पत्नीचा एड्सच्या दुर्धर आजाराने मृत्यू झाल्यानंतर त्यांच्या जीवनामध्ये नैराश्य, भीतीयुक्त वातावरण निर्माण होते. एकटेच आयुष्य जगावे लागले. अशा विधवा व विधुरांना मानसिक आधार देऊन स्वाभिमानी अर्थपूर्ण वैवाहिक जीवन जगण्याची प्रेरणा निर्माण करून त्यांचे विवाह संस्थेच्या माध्यमातून लावून देण्यात येतात. याकरिता संस्थेच्या अध्यक्ष शुभांगी खराटे, उपाध्यक्ष गौतम ढाले, सचिव गोपाल चव्हाण यांच्यासह सदस्य कार्यरत असतात.

** चार जोडप्यांना झाली सदृढ मुले
पती-पत्नी दोघेही एचआयव्ही पॉझिटिव्ह असल्यावर त्यांनी शारीरिक संबंध ठेवताना व मातेने गर्भधारणेच्या वतीने योग्य औषधोपचार घेतल्यास निगेटिव्ह मुले होऊ शकतात. एनएपी संस्थेने लावलेल्या अठरा विवाहांपैकी चार जोडप्यांना चार निगेटिव्ह मुले झाली आहेत. त्यांना एड्स नसून, त्यांची प्रकृती ठणठणीत असल्याचे संस्थेचे सचिव चव्हाण यांनी सांगितले.