पतंग उडवताना वीज यंत्रणेपासून राहा चार हात लांब!

Akola News विद्युत सुरक्षिततेचे नियम पाळावेत, असे आवाहन महावितरण अकोला परिमंडळाच्या वतीने करण्यात आले आहे.

अकोला : मकरसंक्रांतीनिमित्त पतंगोत्सव साजरा करताना उच्च व लघू दाबाच्या वीजवाहिन्या, फिडर व वीज यंत्रणांपासून सावधगिरी बाळगावी व विद्युत सुरक्षिततेचे नियम पाळावेत, असे आवाहन महावितरणअकोला परिमंडळाच्या वतीने करण्यात आले आहे.

 अवघ्या तीन दिवसांवर आलेल्या संक्रांतीमुळे पतंगप्रेमी आनंदले आहेत. पतंग आणि मांजा विक्रीची दुकाने सर्वत्र थाटण्यात आली असून, दिवसेंदिवस आकाशातही रंगीबेरंगी पतंगांची गर्दी वाढत आहे. या आनंदाच्या उत्सवात विघ्न येऊ नये याकरिता महावितरणने सर्व संक्रांतप्रेमींना पतंग उडविताना सावधगिरी बाळगण्याचे आवाहन केले आहे. शहरी तसेच ग्रामीण भागात वीज वितरणच्या लघू व उच्च दाबाच्या वाहिन्यांचे जाळे पसरलेले असते. अनेकदा पतंग उडविताना किंवा कटलेले पतंग विजेच्या तारांवर किंवा खांबावर अडकतात. ते अडकलेले पतंग काठ्या, लोखंडी सळई किंवा गिरगोट यांच्या माध्यमातून काढण्याचा प्रयत्न केला जातो. अशावेळी अनेकदा जिवंत विद्युत तारेला स्पर्श होऊन जीवावर बेतू शकते. अनेकदा अडकलेल्या पतंगाचा मांजा खाली जमिनीवर लोंबकळत असतो. हा मांजा ओढून पतंग काढण्याच्या प्रयत्नात विजेचा भीषण अपघात होऊ शकतो. मांजा ओढताना एका तारेवर दुसऱ्या तारेचे घर्षण होऊन शॉर्टसर्किटमुळे प्राणांकित अपघात होऊ शकतो.

प्रामुख्याने शहरासह ग्रामीण भागातही वीज यंत्रणा अस्तित्वात आहे. वीज वाहिन्यांच्या परिसरात नागरिक आणि लहान मुले पतंग उडवितात. अनेक पतंग या वीजवाहिन्यांमध्ये किंवा इतर यंत्रणेत अडकतात व या वेळी पतंग काढताना अनेकवेळा अपघात घडतात. नागरिक व लहान मुलांनी वीज वाहिन्या, वीज यंत्रणा असलेल्या परिसराऐवजी सुरक्षित आणि मोकळ्या मैदानांत पतंगोत्सव साजरा करावा, असे आवाहन महावितरणने केले आहे.

 

धातूमिश्रित मांजा धोकादायक

बाजारामध्ये धातूमिश्रित मांजा मिळतो. दोऱ्यावर धातूमिश्रित रसायनाचे कोटिंग केलेले असल्यामुळे त्यातून वीज प्रवाह संचार करू शकतो. असा मांजा विद्युत तारेला अडकताच विद्युत यंत्रणेमध्ये बिघाड होऊन संबंधित भागातील वीजपुरवठा खंडित होऊ शकतो. तसेच या मांजामुळे अपघाताची शक्यतासुद्धा नाकारता येत नाही.

 

पालकांनी याबाबत दक्ष राहून लहान मुलांना सुरक्षितपणे पतंग उडविण्याबाबत मार्गदर्शन करावे. वीजप्रवाह असलेल्या यंत्रणेपासून दूर राहूनच पतंगोत्सव साजरा करावा. अपघाताच्या दुर्दैवी घटना टाळण्यासाठी सावधानता बाळगावी.

- फुलसिंग राठोड,

जनसंपर्क अधिकारी,

महावितरण अकोला परिमंडळ