ट्रकची समोरासमोर धडक; दोन जण गंभीर जखमी

अपघातामुळे वाहतुकीची मोठी कोंडी

अकोला : मूर्तिजापूरमध्ये रात्री १२.३० च्या दरम्यान दोन ट्रकची समोरासमोर जोरदार धडक झाली. या विचित्र अपघातात दोन जण गंभीर जखमी झाले असून दोन्ही बाजूंनी वीस किलोमीटरपर्यंत वाहतूक ठप्प झाली आहे.काल रात्री १२.३० च्या दरम्यान अमरावतीच्या दिशेनं जात असलेल्या ट्रकनं (जेजे ०६ एव्ही ६३६८) दुसऱ्या ट्रकला (डब्ल्यू बी २३ डी ६२३३) जोरदार धडक दिली. अनभोरा-सोनोरी दरम्यान मदरशाजवळ झालेल्या या अपघातात दोन्ही ट्रक चालक गंभीर जखमी झाले. हा अपघात इतका भीषण होता की, ट्रकची कॅबिन कापून जखमींना बाहेर काढण्यात आलं. जखमींना उपचारासाठी सर्वोपचार रुग्णालयात दाखल करण्यात आलं आहे.जोरदार धडक झाल्याने दोन्ही ट्रक महामार्गावर आडवे झाले आहेत. त्यामुळे संपूर्ण महामार्गावरील वाहतूक ठप्प झाली असून दोन्ही बाजूंनी पंधरा किलोमीटरपर्यंत वाहनाच्या रांगा लागल्या आहेत. सध्या क्रेन बोलावून दोन्ही ट्रक हटवून वाहतूक सुरळीत करण्याचा प्रयत्न चालू आहे.