लोकनृत्याच्या तालावर सारेच थिरकले !

लोककलेला पहिल्याच दिवशी प्रेषकांचा उत्स्फूर्त प्रतिसाद मिळाला.

खामगाव: लावणी, भारुड, गरबा अशा विविध सादर केलेल्या लोककलेला पहिल्याच दिवशी प्रेषकांचा उत्स्फूर्त प्रतिसाद मिळाला. एकापेक्षा एक बहारदार नृत्य सादर झाल्याने लोकनृत्याला सभागृहाने अक्षरश: डोक्यावर घेतले. पहिल्या दिवसाचे वैशिष्ट्यच लोकनृत्य ठरले. संत गाडगेबाबा अमरावती विद्यापीठ युवा महोत्सव २0१५-१६ चे स्थानिक जी.एस.महाविद्यालयावर आयोजित असून, मंगळवारी उद्घाटन झाले. महाविद्यालयाच्या इनडोअर हॉलमध्ये लोकनृत्य सादरीकरण झाले. पहिल्या दिवशी बुलडाणा, अकोला जिल्ह्यातील महाविद्यालयांना लोकनृत्यांची संधी मिळाली. चला जाऊ बाजारी, या बहारदार गीताने लोकनृत्याची सुरुवात झाली; परंतु परीक्षकांनी हे गीत बाद ठरविले. यानंतर गरबा, उदे ग अंबे उदे, चला गं मंगळा गौरीचा करुया जागर, अंबाबाईचा जोगवा अशा एकापेक्षा एक सरस कलाविष्काराने सभागृह दणाणून सोडले. विद्यार्थ्यांंंच्या टाळ्या, शिट्यांचा आवाज यामुळे कला सादर करणार्‍यांचाही उत्साह कमालीचा वाढला होता. युवा महोत्सवात इतरही कार्यक्रमाचे आयोजन असताना लोकनृत्याला प्रेषकांची उपस्थिती लक्षणीय होती. स्पर्धेचे समन्वयक म्हणून प्रा.बी.एम.डोंगरे तर परीक्षक म्हणून गौरी ठाकरे अमरावती, अँड.रसिक वडवेकर अमरावती, प्रा.डॉ.सीमा देशमुख, प्रा.एम.आर.इंगळे यांनी जबाबदारी पार पाडली. यामध्ये जनता कला वाणिज्य महाविद्यालय मलकापूर, राजश्री शाहू कॉलेज ऑफ इंजिनिअरींग बुलडाणा, कॉलेज ऑफ मॅनेजमेंट खामगाव, अनुराधा कॉलेज ऑफ फार्मसी चिखली, गो.से.महाविद्यालय खामगाव, कला, विज्ञान महिला महाविद्यालय मेहकर, अनुराधा कॉलेज ऑफ इंजिनिअरींग चिखली, श्रीमती के.के.अग्रवाल कला, वाणिज्य महाविद्यालय मलकापूर, एम.ई.एस.कला, वाणिज्य महाविद्यालय मेहकर, श्रीमती एस.आर.मोहता महिला महाविद्यालय खामगाव, श्री संत गजानन महाराज कॉलेज ऑफ इंजिनिअरींग शेगाव, माउली कॉलेज ऑफ इंजिनिअरींग अँण्ड टेक्नॉलॉजी शेगाव या महाविद्यालयांनी सहभाग दिला.