दिवाळीसाठी अतिरिक्त बसेसचे नियोजन

राज्यात १७,५५0 बसेस : अमरावती विभागात ८७५ बसेस.

वाशिम : दिवाळीनिमित्त होणारी प्रवाशांची गर्दी विचारात घेऊन, एस.टी. महामंडळाने अतिरिक्त बसेसचे नियोजन केले आहे. राज्यभरातून १७ हजार ५५0 अतिरिक्त बसेस दिवाळीदरम्यान धावणार असून, अमरावती विभागासाठी ८७५ बसेसची व्यवस्था करण्यात आली आहे.
दिवाळी आठ दिवसावर येऊन ठेपली आहे. शाळांना सुट्या लागल्या की, प्रवाशांची एकच गर्दी होते, हा दरवर्षीचा अनुभव आहे. या गर्दीमुळे प्रवाशांची गैरसोय होऊ नये आणि महामंडळाला अतिरिक्त उत्पन्न मिळावे, या दृष्टिकोनातून एस.टी. महामंडळ दरवर्षी अतिरिक्त बसेसचे नियोजन करीत असते. गतवर्षी दिवाळीनिमित्त राज्यभरातून १४ हजार ८६0 अतिरिक्त बसेस सोडण्यात आल्या होत्या; मात्र तरीही गर्दीमुळे प्रवाशांना गैरसोयीचा सामना करावाच लागला होता. हा अनुभव लक्षात घेऊन, यावर्षी २६९0 बसेस वाढविण्यात आल्या आहेत. प्रवाशांच्या सोयीसाठी महामंडळाने ऑनलाईन आरक्षणाची सुविधाही उपलब्ध करून दिली आहे.
नागपूर प्रादेशिक विभागातून ७७५, अमरावती विभागातून ८७५, नाशिकमधून ३३७५, पूणे ४५७५, औरंगाबाद ४७00, मुंबई प्रादेशिक विभागातून ३२५0, अशा एकूण १७ हजार ५५0 अतिरिक्त बसेस प्रवाशांच्या सेवेत तैनात करण्यात आल्या आहेत. ही सेवा १६ ऑक्टोबर ते ९ नोव्हेंबरदरम्यान सुरू राहणार आहे. अमरावती विभागातील अकोला व वाशिम या दोन जिल्ह्यात ७५, अमरावती १५0, यवतमाळ १00 आणि बुलडाणा जिल्ह्यासाठी ५५0 अतिरिक्त बसेसचे नियोजन करण्यात आले आहे. गतवर्षी हाच आकडा २४0 होता. यामध्ये अमरावती जिल्ह्यात ४0, अकोला व वाशिम जिल्ह्यात ६0, बुलडाणा ८0 तर यवतमाळ जिल्ह्याला ६0 अतिरिक्त बसेस मिळाल्या होत्या. यावर्षी प्रवाशांची वाढती गर्दी गृहित धरून अतिरिक्त बसेसच्या संख्येतही वाढ करण्यात आली आहे. १६ ऑक्टोबरपासून या अतिरिक्त बसेस प्रवाशांच्या सेवेत धावणार आहेत.

अमरावती विभागातील अतिरिक्त बसेसचे नियोजन
अकोला-वाशिम             ७५
अमरावती                  १५0
यवतमाळ                  १00
बुलडाणा                    ५५0
एकूण                        ८७५