ऑनलाईन शिक्षण अन् मोबाईलने लावला मुलांना चष्मा!

कोरोनामुळे शाळा बंदच आहेत. विद्यार्थ्यांचे शैक्षणिक नुकसान होऊ नये म्हणून ऑनलाईन शिक्षणावर भर दिला जात आहे. ऑनलाईन शिक्षणामुळे स्क्रीन टाईम वाढला आहे. ऑनलाईन शिक्षण संपले की मुले मोबाईलवर खिळून राहतात. त्याचे विद्यार्थ्यांच्या डोळ्यांवर दुष्परिणाम होत आहेत. तासन्‌ तास मोबाईल, संगणकासमोर बसल्याने विद्यार्थ्यांना डोळेदुखीचा त्रास जाणवतो.

लहान मुलांमध्येही डोकेदुखी वाढली

सतत मोबाईल, संगणक वापरल्याने लहान मुलांना डोकेदुखीचा आजार जडत आहे. डोकेदुखी वाढत असल्याने मुलांमध्ये एकाग्रता राहत नाही.

डोळ्यांच्या आरोग्यासाठी नैसर्गिक सूर्यप्रकाश खूप आवश्यक असतो. जास्त वेळ ऑनलाईन स्क्रीनसमोर असेल तर मुलांच्या चष्म्याचा नंबर वाढू शकतो.

प्रत्येक २० मिनिटांनंतर २० फूट दूर ठेवलेल्या वस्तूकडे २० सेकंदासाठी पाहावे. यामुळे डोळ्यांना आराम मिळतो. पर्यायाने डोकेदुखीचा त्रास कमी होईल.

लहान मुलांना हे धोके...

सतत मोबाईल आणि संगणक वापरल्याने डोळे, मेंदूवर ताण पडतो. त्यामुळे साहजिकच डोकेदुखीचा त्रास जाणवतो.

चिडचिडही वाढू शकते. मेंदूवर जास्त ताण आल्यास अभ्यासात मन लागत नाही. एकाग्रता राहत नाही.

डोळ्यांना त्रास होऊ नये म्हणून...

संगणक स्क्रीनवर अ‍ँटिग्लेयर ग्लास बसवावी

पुस्तक/संगणक उजेडात असावा

जास्तीत जास्त फळांचे सेवन करा

अ‍ँटिग्लेयर चष्मा वापरावा

प्रत्येक तासिकेनंतर डोळे बंद ठेवून थोडा आराम द्यावा

पुस्तक १२ ते १५ इंच लांब धरावे

पालकही चिंतेत

कोरोनामुळे शाळा बंदच आहेत. यामुळे ऑनलाईन शिक्षण व्यवस्था अंमलात आली आहे. याद्वारे विद्यार्थ्यांचा अभ्यास घेतला जात असला तरी, मुलांना मोबाईलचे व्यसन जडत असल्याचे दिसून येते. ऑनलाईन शिक्षणामुळे मुले अधिकाधिक वेळ संगणक व मोबाईलसमोर असतात. यामुळे डोळ्यांच्या समस्या उद्भवत आहेत.

- सुनील किर्तने, पालक

ऑनलाईन शिक्षणामुळे विद्यार्थ्यांचे शैक्षणिक नुकसान टाळले जात आहे, ही बाब चांगलीच आहे. परंतु, ऑनलाईन क्लास संपल्यानंतर मुले जास्त प्रमाणात मोबाईल, संगणक, टॅबचा वापर करतात. यामुळे मुलांच्या आरोग्यावर परिणाम होत आहे. मुलांना डोळे व डोकेदुखीचा तसेच मानदुखीचा त्रासही जाणवतो.

- प्रशांत देशमुख, पालक

संगणक आणि मोबाईलच्या अति वापरामुळे मुलांमध्ये डोळेदुखी, डोळ्यांतून पाणी येणे असे प्रकार वाढत आहेत. जास्त वेळेसाठी मोबाईल, लॅपटाॅपवर लक्ष केंद्रित केल्यामुळे डोळ्यांना थकवा येणे, डोळे कोरडे पडणे व त्यामुळे डोळ्यांना खाज येणे, लाल होणे, डोळे दुखणे आदी लक्षणे दिसून येतात. ऑनलाईन ‘स्क्रीन टाईम’ जास्त असेल तर डोळ्याला त्रास जाणवू लागतो. डोळ्यांवर ताण येत असल्याने डोकेदुखीचा त्रासही जाणवतो.

- डॉ. राजेश पवार, नेत्रतज्ज्ञ, जीएमसी, अकोला