मनपाची मुख्य जलवाहिनी फुटली!

कान्हेरी सरप रोडवरील चांगेफळ फाट्यानजीक प्रकार.

अकोला: महान धरणात अत्यल्प जलसाठा उपलब्ध आहे. अशास्थितीत पाणीपुरवठय़ाचे काटेकोरपणे नियोजन करण्याची गरज निर्माण झाली असतानाच शुक्रवारी सायंकाळी ५ वाजता कान्हेरी सरप रोडवरील चांगेफळ फाट्यानजीक शहराला पाणीपुरवठा करणारी मनपाची मुख्य जलवाहिनी फुटली. यामुळे लाखो लीटर पाण्याची नासाडी झाली असून, पाण्याचा प्रचंड दाब असल्याने नजीकच्या शेतांमध्ये पूर आल्याचे चित्र समोर आले. महान धरण ते अकोला शहरापर्यंत ९00 मि.मी. व्यासाच्या मुख्य जलवाहिनीचे जाळे टाकण्यात आले आहे. शुक्रवारी शहरातील जलकुंभात पाणी पोहोचविण्याची प्रक्रिया सुरू असताना पाण्याचा प्रवाह आणि दाब कमी झाल्याची बाब महापालिकेच्या जलप्रदाय विभागाच्या निदर्शनास आली. या बाबीची शहानिशा करण्यात आली असता सायंकाळी ५ वाजता कान्हेरी सरप रस्त्यावरील चांगेफळ फाट्यानजीक मुख्य जलवाहिनी फुटल्याचे समोर आले. ९00 मी.मी व्यासाच्या मुख्य जलवाहिनीचा दाब प्रचंड मोठा असल्याने नजीकच्या शेतामधून अक्षरश: पुराचे पाणी वाहत असल्याचे चित्र होते. सायंकाळी ५ वाजतापासून सुरू झालेली गळती जलवाहिनीतील पाणी संपेपर्यंत सुरूच असल्याने लाखो लीटर पाण्याची नासाडी झाली.