‘ऑनलाइन’ उमेदवारी अर्ज भरण्यात ‘इंटरनेट कनेक्टिव्हिटी’चा खोडा

ग्रामपंचायतींची निवडणूक; पहिला दिवस कोरा.

अकोला: जिल्ह्यातील २२0 ग्रामपंचायतींच्या सार्वत्रिक आणि ४८ ग्रामपंचायतींच्या पोटनिवडणुकांसाठी ऑनलाइन उमेदवारी अर्ज सादर करण्याची प्रक्रिया सोमवार, १३ जुलैपासून सुरू झाली; मात्र शहरासह जिल्ह्यातील ग्रामीण भागात इंटरनेट कनेक्टिव्हिटी नसल्यामुळे ऑनलाइन उमेदवारी अर्ज भरण्यात खोडा निर्माण होत आहे. त्यामुळे उमेदवारी अर्ज दाखल करण्याच्या पहिल्या दिवशी एकही उमेदवारी अर्ज दाखल झाला नसल्याने, उमेदवारी अर्ज दाखल करण्याचा पहिला दिवस जिल्ह्यात कोरा ठरला आहे. जिल्हय़ातील ऑगस्ट ते ऑक्टोबर या कालावधीत मुदत संपणार्‍या जिल्ह्यातील सातही तालुक्यातील २२0 ग्रामपंचायतींच्या सार्वत्रिक निवडणुकांसाठी आणि ४८ ग्रामपंचायतींच्या पोटनिवडणुकांसाठी ४ ऑगस्ट रोजी मतदान घेण्यात येणार आहे. या निवडणुकांसाठी ऑनलाइन उमेदवारी अर्ज दाखल करणे व स्वीकारण्याची प्रक्रिया १३ जुलैपासून सुरू झाली आहे. १८ व १९ जुलै हे सुटीचे दोन दिवस वगळता २0 जुलैपर्यंंत दररोज सकाळी ११ ते दुपारी ४ वाजेपर्यंंत उमेदवारी अर्ज दाखल करता येतील. सेतू सुविधा केंद्र, ई-महासेवा केंद्र, ग्रामपंचायतींमधील संग्राम कक्ष किंवा इंटरनेट सुविधा उपलब्ध असलेल्या कोणत्याही ठिकाणी इच्छुक उमेदवारांनी ऑनलाइन उमेदवारी अर्ज भरावयाचे आहेत.ऑनलाइन उमेदवारी अर्ज भरल्यानंतर त्याची प्रिंट काढून तहसीलदार तथा निवडणूक अधिकार्‍यांकडे सादर करावयाची आहे. परंतु शहरासह ग्रामीण भागातील बहुतांश सेतू सुविधा केंद्र, ई-महासेवा केंद्र, ग्रामपंचायतींच्या संग्राम कक्षातील इंटरनेट सुविधेत कनेक्टिव्हिटी नसल्यामुळे ग्रामपंचायत निवडणुकीसाठी ऑनलाइन उमेदवारी अर्ज भरण्यात उमेदवारांना अडचणींचा सामना करावा लागत आहे. त्यामुळे उमेदवारी अर्ज दाखल करण्याच्या पहिल्या दिवशी (सोमवारी) एकही उमेदवारी अर्ज दाखल करण्यात आला नसून, ग्रामपंचायत निवडणुकांसाठी उमेदवारी अर्ज दाखल करण्याचा पहिला दिवस कोरा ठरला.