लहान मुलांमध्ये वाढले सर्दी, तापाची लक्षणे

Increased cold, fever symptoms in young children : पालकांनी घाबरून न जाता बालरोगतज्ज्ञाचा सल्ला घेण्याचे आवाहन बालरोगतज्ज्ञांकडून केले जात आहे.

अकोला : जिल्ह्यात बालकांमध्ये कोरोनाचे प्रमाण कमी असले, तरी अनेक बालकांमध्ये सर्दी, तापाची लक्षणे आढळून येत आहेत. कोविडसदृश लक्षणे असल्याने पालकांमध्ये भीतीचे वातावरण निर्माण झाले आहे, मात्र पालकांनी घाबरून न जाता बालरोगतज्ज्ञाचा सल्ला घेण्याचे आवाहन बालरोगतज्ज्ञांकडून केले जात आहे. शिवाय, कुटुंबातील प्रत्येक सदस्याने नियमित मास्कचा वापर करून इतरांपासून सुरक्षित अंतर ठेवावे, तसेच नियमित हात स्वच्छ धुणे या त्रिसूत्रीचे पालन करत मुलांना जपण्याचेही आवाहन करण्यात येत आहे. जिल्ह्यात कोरोनाचे थैमान सुरू असताना लहान मुलांमध्येही खोकल्यासह तापाची लक्षणे दिसून येत आहेत. त्यामुळे जिल्ह्यातील लहान मुलांच्या दवाखान्यांमध्ये गर्दी वाढली असून अनेक पालक कोरोनाच्या भीतीपोटी भ्रमणध्वनीद्वारेच डॉक्टरांचा सल्ला घेत आहेत. राज्यातील काही भागात १० वर्षांखालील मुलांनाही कोराेनाची लागण झाल्याचे प्रमाण वाढत असल्याने पालकांमध्ये भीतीचे वातावरण पसरले आहे. त्यामुळे लहान मुलांसाठीदेखील कोरोनाचा धोका वाढत आहे. गत मार्च महिन्यात जिल्ह्यातील कोविड बाधित रुग्णांमध्ये केवळ एका बालकाचा समावेश असला, तरी अनेक बालकांमध्ये कोरोनाचे लक्षणे आढळून आल्याचे तज्ज्ञांचे मत आहे. अहवाल पॉझिटिव्ह आल्यास बालकांना सर्वांपासून वेगळे ठेवण्याची वेळ येईल या भीतीपोटी पालकही बालकांच्या कोविड चाचणीला टाळत असल्याचे चित्र दिसून आले. ही स्थिती पाहता बालकांनाही कोरोनाचा धोका कायम असून पालकांनी आवश्यक काळजी घेण्याची गरज आहे.

 

काय आहेत लक्षणे

 

अनेक बालकांना सर्दी, ताप, खोकला, हगवण आदी लक्षणे आढळून येतात. बालकांमध्ये ही लक्षणे आढळताच पालकांनी त्यांना तत्काळ बालरोगतज्ज्ञांकडे घेऊन जाणे आवश्यक आहे. तज्ज्ञांच्या मते, बालकांमधील या समस्या नेहमीच्याच औषधांनीच सुटत असल्याने पालकांनी घाबरून जाण्याचे कारण नाही. मात्र या लक्षणांकडे विशेष लक्ष देण्याची गरज आहे.

 

तर ‘कावासाकी’ आजाराचाही धोका

कुटुंबात कुणाला कोरोना होऊन गेल्यानंतर लहान बालकांमध्ये गोवराची लक्षणे आढळल्यास किंवा अंगावर चट्टे येणे, तोंड येणे, डोळे येणे आदी लक्षणे आढळल्यास बालकांना कावासाकी हा आजार होण्याची शक्यता नाकारता येत नाही. अशा परिस्थितीत पालकांनी तत्काळ बालरोगतज्ज्ञांचा सल्ला घेणे आवश्यक आहे.

 

त्रिसूत्रीचे पालन करणे शिकवा

लहान मुलांना कोरोनासह इतर विषाणूजन्य आजारापासून बचावासाठी त्रिसूत्रीचे पालन करण्याचे मार्गदर्शन पालकांनी करावे. यामध्ये प्रामुख्याने मास्क कसा घालावा, इतरांपासून सुरक्षित अंतर कसे राखावे तसेच वारंवार साबणाने स्वच्छ हात धुणे आदींचे मार्गदर्शन करावे, असे आवाहन तज्ज्ञांकडून करण्यात येत आहे.

 

कोरोनाचा प्रादुर्भाव वाढत असून, त्याचा परिणाम लहान बालकांवरही होत आहे. अनेक बालकांमध्ये सर्दी, ताप, खोकल्यासह हगवण आदी लक्षणे आढळून आली आहेत, मात्र पालकांनी यामुळे घाबरून न जाता योग्य काळजी घेण्याची गरज आहे. अशी लक्षणे दिसताच बालरोगतज्ज्ञांचा सल्ला घ्यावा, तसेच घरात कुणाला कोरोना होऊन गेल्यावर बालकांमध्ये गोवर, तोंड येणे, डोळे येणे आदी लक्षणे आढळल्यास कावासाकी या आजाराचा धोका असून शकतो. त्यामुळे विशेष दक्षता घेण्याची गरज आहे.

- डॉ. अनुप चौधरी, बालरोगतज्ज्ञ, मनपा आरोग्य विभाग, अकोला