युपीएससी परीक्षा उत्तीर्ण प्रांजलच्या प्रकृतीत सुधारणा

पातूर तालुक्यातील तांदळी येथील केंद्रीय लोकसेवा आयोगाची परीक्षा पास झालेल्या प्रांजल प्रभाकर नाकट या युवकाला कोरोनाची बाधा झाली. त्याची प्रकृती अत्यंत गंभीर होती. अशावेळी राष्ट्रवादी काँग्रेसचे प्रदेश नेते कृष्णाभाऊ अंधारे आणि आमदार अमोल मिटकरी यांच्या पुढाकारामुळे त्याच्यावर उपचार करण्यासाठी हैदराबाद येथून पाच डॉक्टरांची चमू गत आठवड्यात विमानाने अकोल्यात दाखल झाली होती. डॉक्टरांनी तातडीने मध्यरात्री २ वाजता उपचार सुरु करून पुढील उपचारासाठी प्रांजलला हैदराबाद येथे एअर ॲम्ब्युलन्स अकोल्यातून हलविण्यात आले होते. सामान्य कुटुंबातील प्रांजलचे जीव वाचविण्यासाठी वडील प्रभाकर नाकट आणि आई अनुराधा नाकट यांनी शर्थीचे प्रयत्न करून नातेवाईकांच्या मदतीने ५५ लाख रुपयाची रक्कम जोडली होती.

फोटो:

प्रांजल आता धोक्याबाहेर

एक आठवड्याच्या उपचारानंतर बेशुद्ध अवस्थेतील प्रांजलने डोळे उघडले असून आता त्याची तब्येत धोक्याबाहेर असल्याचे त्याच्यावर उपचार करणाऱ्या डॉक्टरांनी सांगितले. त्यामुळे नाकट कुटुंबीयांना थोडाबहुत दिलासा मिळाला आहे. त्याच्या प्रकृतीत सुधारणा होण्यासाठी अनेकजण प्रार्थना करीत आहेत.

नाकट कुटुंबीयांची लोकमतप्रति कृतज्ञता

प्रांजल नाकट याला हैदराबादला उपचारासाठी एअर ॲम्ब्युलन्सने पाठविल्यानंतर त्याचे वडील प्रभाकर नाकट आणि नातेवाईक वाहनाने हैदराबादकडे निघाले. यवतमाळ-नेर चेकपोस्टजवळ त्यांना पोलिसांनी थांबवून, त्यांची चौकशी केली. त्यांच्याकडे परप्रांतात जाण्यासाठी ई-पास नसल्यामुळे पोलीस त्यांना पुढे जाऊ देईनात. यावेळी त्यांनी मुलाच्या प्रकृतीबाबत व लोकमतमधील प्रांजलची बातमी दाखविली. लोकमतमधील वृत्त पाहून, पोलिसांनी पासशिवाय त्यांना पुढे जाण्यास परवानगी दिली. त्यामुळे लोकमतप्रति नाकट परिवाराने कृतज्ञता व्यक्त केली.