अडगावात अवैध धंद्यांचा सुळसुळाट

गावात गेल्या दोन वर्षांपासून सर्रास वरली मटका, अवैध दारू विक्री खुलेआम सुरू असल्याची तक्रार वाॅर्ड नंबर ३ मधील नागरिकांनी लेखी निवेदनाद्वारे केली आहे. आता तर गावातील मुख्य चौकात वरली मटका खेळणारे घरपोच सेवा देत आहेत. तसेच शाळेच्या मुलांचा जाण्या-येण्याच्या रस्त्यावरील बाजारपुरा परिसरात व पुरातन काळा मारोती मंदिर परिसरात दारू पिणारे व वरली मटका खेळणारे खुलेआम फिरताना दिसतात. यामुळे या परिसरातील जनतेला जगणे कठीण झाले आहे. बाजारपुरा परिसरातील नागरिकांच्या व शाळेतील विद्यार्थ्यांकरिता असलेल्या या रस्त्यावरील अवैध धंद्यांबाबत स्थानिक पोलीस चौकीला वारंवार सूचना दिल्यानंतरही दखल घेण्यात आली नाही. त्यामुळे गावात खुलेआम सुरू असलेल्या अवैध धंद्यांमुळे शांतता व सुव्यवस्थेचा प्रश्न निर्माण झाला आहे. गावातील व वाॅर्ड नंबर ३ मधील खुलेआम सुरू असलेले अवैध धंदे बंद न झाल्यास आंदोलनाचा मार्ग स्वीकारावा लागेल, असा इशारा नागरिकांनी दिला आहे.