धान्य गोदामांची तपासणी होणार

राज्यातील १0२४ धान्य उचल व वितरण रेकॉर्डची होणार तपासणी

नीलेश शहाकार / बुलडाणा: सार्वजनिक वितरण व्यवस्थेंतर्गत राज्यातील शासकीय धान्य गोदामांची तपासणी केली जाणार आहे. असे आदेश शासनाच्या पुरवठा विभागाकडून प्रत्येक जिल्ह्यातील पुरवठा अधिकार्‍यांना देण्यात आले आहे. या प्रक्रियेत राज्यातील १0२0 धान्य गोदामातून करण्यात आलेली धान्याची उचल आणि केलेले वितरण, याबाबतच्या रेकॉर्डची पडताळणी केली जाणार आहे.
सार्वजनिक वितरण व्यवस्थेअंतर्गत दारिद्रय़रेषेखालील (बीपीएल) आणि अंत्योदय योजनेंतर्गत राज्यातील शिधापत्रिकाधारकांना रास्तभाव दुकानांमधून दरमाह धान्याचे वितरण केले जाते. त्यासाठी संबंधित जिल्हा पुरवठा अधिकार्‍यांकडून आवश्यक असलेल्या धान्यसाठय़ाची मागणी दरमाह शासनाच्या पुरवठा विभागाकडे करण्यात येते. मागणीनुसार (नियतन) उपलब्ध झालेला धान्यसाठा प्रत्येक जिल्ह्यात तालुकास्तरावर शासकीय धान्य गोदामांच्या ठिकाणी वितरित करण्यात येतो. धान्याचे मंजूर नियतन, तालुकास्तरावर धान्य गोदामांच्या ठिकाणी करण्यात आलेली धान्याची उचल आणि त्यामधून प्रत्यक्ष वितरित करण्यात आलेला धान्यसाठा, तसेच गोदामांमध्ये सद्यस्थितीत उपलब्ध असलेला धान्यसाठा याची वर्षातून एकदा तपासणी केली जा ते. विभागीय आयुक्त कार्यालयामार्फत निश्‍चित करण्यात आलेल्या वेळापत्रकानुसार महसूल विभागांतर्गत अधिकार्‍यांकडून गोदामनिहाय तपासणी करण्यात येणार आहे. त्यानुसार अमरावती विभागातील अकोला, अमरावती, बुलडाणा, वाशिम व यवतमाळ या पाचही जिल्ह्यातील ११२ धान्य गोदामांची तपासणी करण्याचे आदेश अमरावती विभागीय आयुक्त कार्यालयामार्फत १२ फेब्रुवारी रोजी संबंधित जिल्हाधिकार्‍यांना देण्यात आले. एका जिल्ह्यातील महसूल अधिकारी दुसर्‍या जिल्ह्यात नमून दिलेल्या धान्य गोदामांची तपासणी करणार आहेत. या तपासणीत धान्यसाठय़ातील अनियमिततेसंबंधी विशेष पडताळणीही केली जाणार आहे.

*बुलडाणा जिल्ह्यात १६ गोदामांची तपासणी
जिल्ह्यात मलकापूर, मोताळा, नांदूरा, संग्रामपूर, शेगाव, खामगाव, चिखली, मेहकर, डोणगाव, साखरखेर्डा, लोणार, सिंदखेडराजा, देऊळगावराजा, अमडापूर, बुलडाणा, जळगाव जमोद अश्या १६ शासकीय गोदामांतील सार्वजनिक वितरण व्यवस्थेअंतर्गत धान्य उचल आणि केलेले वि तरण, याबाबतच्या रेकॉर्डची पडताळणी केली जाणार आहे.