नितीन गव्हाळे, अकोला : सिव्हिल लाईन हद्दीतील लहान उमरी परिसरात फ्लिपकार्ट डिलिव्हरी एजंटला अडवून ८५ हजार रूपये रोख व मोबाइल हिसकावून मारहाण करून जबरी चोरी करणाऱ्या तीन जणांच्या टोळीला १२ जुलै रोजी स्थानिक गुन्हे शाखा पोलिसांनी २४ तासांत गजाआड करून १ लाख ३८ हजार रूपयांचा मुद्देमाल जप्त केला.
लहान उमरी येथील ढोके पेट्रोलपंपासमोर १० जुलै राेजी तक्रारदार फ्लिपकार्ट डिलिव्हरी एजंट दुचाकीने शहरात येत असताना अज्ञात आरोपींनी दुचाकी अडवून ८५ हजार रूपये रोख व मोबाइल हिसकावून मारहाण केली होती. याप्रकरणात सिव्हिल लाईन पोलिसांनी भादंवि कलम ३९४, ३४१, ३४ नुसार गुन्हा दाखल केला होता. या गुन्ह्याचा तपास स्थानिक गुन्हे शाखा पोलिसांनी करून या प्रकरणातील तीन आरोपींना गजाआड करण्यात यश मिळविले आहे.
आरोपींकडून ५८ हजार रूपये रोख, दोन मोबाइल, दुचाकी असा एकूण १ लाख ३८ हजार रूपयांचा मुद्देमाल जप्त केला. ही कारवाई स्थानिक गुन्हे शाखेचे पोलिस निरीक्षक प्रदीप शिरस्कार यांच्या मार्गदर्शनात पीएसआय गोपाल जाधव, दशरथ बोरकर, गोकुळ चव्हाण, लिलाधर खंडारे. अन्सार शेख, स्वप्नील खेडकर, पिंजर पोलिस ठाण्यातील राजू वानखडे, आशिष आमले यांनी केली.