अकोल्यात दीड तासात ३७.३ मि.मी.पाऊस!

गुरूवारी सायंकाळी अखेर पावसाने दमदार हजेरी लावली. जिल्ह्यात पातूर आणि बाश्रीटाकळी तालुक्यासह अकोला तालुक्यातील काही भागात पाऊस पडला.

अकोला- प्रदीर्घ प्रतीक्षेनंतर गुरूवारी सायंकाळी अखेर पावसाने दमदार हजेरी लावली. जिल्ह्यात पातूर आणि बाश्रीटाकळी तालुक्यासह अकोला तालुक्यातील काही भागात पाऊस पडला. शहरात दीड तासात ३७. ३ मिलिमीटर पावसाची नोंद झाली. यावर्षीच्या पावसाळ्यात पहिल्यांदाच गुरुवारी अकोल्यात दमदार पाऊस बरसला. सायंकाळी ४.३0 वाजताच्या सुमारास पावसाला सुरुवात झाली. हलक्या सरीने सुरुवात झाल्यानंतर पावसाची दमदार हजेरी अकोलेकरांना सुखावून गेली. सहा वाजेपर्यंत शहरातील रस्ते जलमय झाले होते. अकोला तालुक्यात कुरणखेडपासून पुढे पाऊस होता. बाश्रीटाकळी आणि पातूर तालुक्यात काही ठिकाणी पाऊस पडला. सरीरात्री ८.३0 वाजेपर्यंत अकोला शहरात ३७.३ मि.मी.पावसाची नोंद हवामान खात्याने केली.

** स्थानिक प्रभावाने पाऊस

सार्वत्रिक पावसासाठी आणखी दोन ते तीन दिवस प्रतीक्षा करावी लागणार आहे. त्यामुळे अकोला शहर व परिसरात पडलेला पाऊस हा वातावरणातील स्थानिक घडामोडींचा परिणाम असल्याची माहिती नागपूर येथील वेधशाळेने दिली. पाऊस प्रणाली अद्याप विकसित झाली नसली तरी त्या दिशेने वाटचाल सुरू आहे. त्यामुळे दोन ते तीन दिवसात सार्वत्रिक पावसाची शक्यता निर्माण झाली आहे.

** विद्युत पुरवठा खंडित

गुरुवारी सायंकाळी पाऊस आल्यामुळे अध्र्या शहरातील विद्युत पुरवठा दोन ते तीन तासांकरिता बंद झाला होता. त्यामुळे नागरिकांना त्रास सहन करावा लागला. गुरुवारी सायंकाळी शहरात एक तास जोरदार पाऊस झाला. त्यामुळे शहरातील विद्युत व्यवस्थेची पूर्ण तारांबळ उडाली. तारा तुटल्याने तसेच रोहित्र बिघडल्याने अध्र्या शहरातील विद्युत पुरवठा खंडित झाला होता. गोरक्षण रोड, गिरी नगर, जुने शहर, खदान परिसरातील विद्युत पुरवठा बंद होता. गिरीनगरमधील विद्युत पुरवठा रात्री दहा वाजेपर्यंत बंद असल्याने नागरिक त्रस्त झाले होते.