प्रस्तावित विकास कामांमध्ये भ्रष्टाचार; तपासणी करून ‘एनओसी’द्या!

काेराेना विषाणूच्या प्रादूर्भावामुळे शुक्रवारी महापालिकेत ऑनलाइन प्रणालीद्वारे सर्वसाधारण सभेचे आयाेजन करण्यात आले हाेते. यावेळी संपूर्ण सभेच्या कामकाजादरम्यान विराेधी पक्ष काॅंग्रेस व शिवसेनेने आक्रमक भूमिका घेतल्याचे पहावयास मिळाले. मागील सभेचे इतिवृत्त मंजूर करण्याला विराेधी पक्षनेता साजीद खान पठाण यांनी तिव्र विराेध नाेंदविला. दरम्यान, स्थानिक लाेकप्रतिनिधींनी शहरात सुचविलेल्या विकास कामांना महापालिकेने नाहरकत प्रमाणपत्र देण्याचा विषय पटलावर आला असता साजीद खान यांनी कडाडून विराेध केला. स्थानिक लाेकप्रतिनिधींनी सूचविलेल्या विकास कामांना मंजूरी देण्याआधी त्यांची तपासणी करा. यातील अनेक कामे अनेकदा प्रस्तावित करून त्याबदल्यात लाखाे रुपयांची देयके लाटली जात असल्याचा संशय व्यक्त करीत साजीद खान यांनी यामध्ये माेठ्या प्रमाणात भ्रष्टाचार दडला असल्याचा आराेप केला. त्यावर आयुक्त् निमा अराेरा यांनी साजीद खान यांना लेखी तक्रार केल्यास प्रस्तावांची छाननी करणे साेयीस्कर हाेणार असल्याचे सांगितले. त्यावर विकास कामांना सभागृहाने मंजूरी देण्यापूर्वी रस्त्यांची तपासणी करा, अन्यथा सर्वांना कायदेशिर अडचण निर्माण हाेइल,असा गर्भित इशारा यावेळी साजीद खान यांनी दिला. यावर विराेधी पक्षातील नगरसेवकांनी आक्षेप घेतला असता निर्माण झालेल्या गदाराेळात महापाैर अर्चना मसने यांनी विषयाला मंजूरी दिली.

मनपाच्या विलंबामुळे विकास कामे प्रभावित

लाेकप्रतिनिधींनी प्रस्तावित केलेल्या विकास कामांना मनपाने तातडीने ‘एनओसी’द्यावी, असे मत माजी महापाैर विजय अग्रवाल यांनी व्यक्त केले. मनपाकडून नाहरकत प्रमाणपत्र देण्यास विलंब हाेत असल्याने या विषयाला तातडीने मंजूरी देण्याची सूचना विजय अग्रवाल यांनी मांडली.

लघु व्यावसायिकांच्या साहित्याची ताेडफाेड नकाे!

काेराेनामुळे सर्व उद्याेग,व्यवसाय अडचणीत आल्याची परिस्थिती असताना सकाळी ९ ते सायंकाळी ५ पर्यंत व्यवसाय करणाऱ्या लघु व्यावसायिकांच्या साहित्याची ताेडफाेड करणे, साहित्य जप्त करून त्याचा लिलाव करणे आदी बाबी याेग्य नसल्याचे मत साजीद खान पठाण यांनी व्यक्त केले. त्यावर जप्त साहित्याचा लिलाव हाेउन अतिक्रमण हटविण्याची कारवाइ हाेणारच असे आयुक्त निमा अराेरा यांनी ठणकावून सांगितले.