अकोला : मध्यंतरी लसीच्या तुटवड्यामुळे ग्रामीण भागातील बहुतांश केंद्रे बंद होती. शहरातील मोजक्याच केंद्रांवर लसीकरण सुरू होते. त्यामुळे लसीकरणाची गती मंदावली होती. मात्र, आता ग्रामीण रुग्णालयांसोबतच प्राथमिक आरोग्य केंद्रांतही (पीएचसी) लसीकरणाला सुरुवात होणार असल्याने मोहिमेला पुन्हा गती मिळणार आहे. कोविड लसीकरण मोहिमेला सुरुवात होऊन सुमारे सहा महिन्यांचा कालावधी पूर्ण झाला आहे. मात्र, आतापर्यंत एकूण उद्दिष्टाच्या केवळ २२ ते २३ टक्केच लसीकरण पूर्ण होऊ शकले आहे. मध्यंतरी लसीचा तुटवडा, तर कधी नागरिकांची उदासीनता या कारणांमुळे लसीकरणाचा वेगही कमी असल्याचे निदर्शनास आले. यामध्ये सर्वांत मोठा आणि उत्सुक असलेल्या युवावर्गाला मात्र लसीकरणाच्या प्रतीक्षेतच राहावे लागले. आता सोमवार, दि.२१ जूनपासून ३० वर्षांवरील सर्वांनाच लस मिळणार आहे. त्या अनुषंगाने लसीकरण केंद्रांमध्येही वाढ केली जात आहे. महापालिका क्षेत्रासह ग्रामीण रुग्णालयांमध्येही लसीकरणाला सुरुवात केली जाणार आहे. त्यामुळे अकोला शहरासह ग्रामीण भागातही लसीकरणाचा वेग वाढण्याची शक्यता आहे. या आठवड्याच्या शेवटी जिल्ह्यातील सर्वच प्राथमिक आरोग्य केंद्रांमध्येही कोविड लसीकरण मोहिमेला सुरुवात केली जाणार असल्याने ग्रामीण भागात लसीकरणाचा वेग वाढणार आहे. यासाठी लागणारा लसीचा मुबलक साठाही जिल्ह्यात उपलब्ध आहे. त्यामुळे यंदा लसीचा तुटवडा भासण्याची शक्यता कमी असल्याने जिल्ह्यात लसीकरणाचा वेग पुन्हा वाढण्याची शक्यता आहे.
अशी असतील केंद्रे
महापालिका क्षेत्र - १०
ग्रामीण रुग्णालय - ०५
पीएचसी - ३१
कोविशिल्ड लसीला प्राधान्य
कोविड लसीरण मोहिमेंतर्गत कोव्हॅक्सिनऐवजी कोविशिल्डला प्राधान्य दिले जाणार असल्याची माहिती आहे. कोव्हॅक्सिनचा पुरवठा अत्यल्प हाेत असल्याने दुसऱ्या डोससाठी मोठी अडचण निर्माण होते. दोन्ही डोसमधील अंतर वाढू नये, तसेच नागरिकांना अडचणीचे जाऊ नये, या अनुषंगाने कोविशिल्ड लसीला प्राधान्य दिले जाणार असल्याची माहिती आहे. कोविशिल्ड लसीचा दर आठवड्यात पुरवठा होत असल्याने तुटवडाही भासणार नसल्याचे आरोग्य यंत्रणेमार्फत सांगण्यात येत आहे.
लसीकरणाविषयी जनजागृतीची गरज
मागील काही दिवसांपासून ४५ वर्षांवरील नागरिकांमध्ये लसीकरणाविषयी उदासीनता असल्याचे दिसून येत आहे. त्यामुळे लसीकरणाची गती मंदावली आहे. ही गती वाढविण्यासाठी ४५ वर्षांवरील नागरिकांमध्ये कोविड लसीकरणाच्या फायद्यांविषयी जनजागृती करण्याची गरज आहे.