अकोला: कोविड लसीकरणाला सुरुवात झाल्याच्या काही दिवसांनंतरच अकोल्यासह विदर्भात कोविडच्या दुसऱ्या लाटेला सुरुवात झाली होती. कोरोनाचा धाेका वाढत असताना लसीकरणाचा वेग वाढविणे गरजेचे होते. मात्र, लसीचा पुरेसा पुरवठा न झाल्याने अकोल्यासह विदर्भातील सर्वच जिल्ह्यांत दुसऱ्या डोसचे लसीकरण संथगतीने होऊ लागले. कोविन डॅशबोेर्डनुसार, विदर्भात आतापर्यंत सर्वाधिक लसीकरण नागपूर जिल्ह्यात झाले आहे, तर अकोल्यात केवळ २४ टक्के लसीकरण झाले आहे. अकोल्यासह राज्यात १६ जानेवारीपासून कोविड लसीकरणास सुरुवात झाली. पहिल्या डोसचे लसीकरण वेगाने झाले. मात्र, गरजेनुसार लसीचा पुरवठा न झाल्याने लसीकरणाचा वेग मंदावला. मार्च, एप्रिल महिन्यांत ज्येष्ठ नागरिकांसोबतच ४५ वर्षांवरील लाभार्थींच्या लसीकरणाला वेग आला. त्यामुळे अकोल्यासह विदर्भातील सर्वच जिल्ह्यांमध्ये मोठ्या प्रमाणात लसीकरण झाले. असे असले तरी अनेकांना लसीकरणाची प्रतीक्षा करावी लागत आहे. पहिला डोस घेतला, तरी लसीअभावी दुसरा डोस मिळणे कठीण झाले. विदर्भात नागपूर, अमरावती, बलडाणा आणि यवतमाळ या जिल्ह्यांत सर्वाधिक लसीकरण झाले असले, तरी दुसऱ्या डोसचे लसीकरण संथ गतीने सुरू आहे.
लोकांमध्ये उत्सुकता, मात्र लस मिळेना
लोकांमध्ये लसीची उत्सुकता असली, तरी विदर्भातील अकराही जिल्ह्यांना गरजेनुसार लस उपलब्ध होत नसल्याने लसीकरणाची गती मंदावली आहे. लस उपलब्ध झाली, तरी मोजक्याच केंद्रांवर लसीकरण सुरू असल्याने लाभार्थींना लस मिळणे कठीण झाले आहे.
तरुणाईला प्रतीक्षा २१ जूनची
राज्यात १८ ते ४५ वर्षे वयोगटातील लाभार्थींचे लसीकरण ठप्प पडले आहे. दरम्यान, २१ जूनपासून या गटातील लसीकरणास सुरुवात होणार असल्याचे केंद्र शासनाने स्पष्ट केले आहे. त्यामुळे तरुणाई २१ जूनची प्रतीक्षा करीत आहे.
जिल्हानिहाय लसीकरण (कोविन डॅशबोर्डनुसार)
जिल्हा - झालेले एकूण लसीकरण
अकोला - ३, ३५,४०६
नागपूर - १३,३५,१५४
अमरावती - ५२२, ७५०
बुलडाणा - ४,७०,९५१
यवतमाळ - ४,६१,६४८
वाशिम - २,६६,७६२
भंडारा - ३, ०५,७५८
वर्धा - ३,०४, ६२८
गोंदिया - ३,११,९२४
गडचिरोली - १,७८, ३४४
चंद्रपूर - ४,०४,५५४