दोन गटात हाणामारी

मुलीच्या विनयभंगाच्या कारणावरून दोन गटात तुफान हाणामारी झाली.

अकोला, दि. २३- अकोट फैलमधील भीमनगर येथे मुलीच्या विनयभंगाच्या कारणावरून दोन गटात तुफान हाणामारी झाल्याची घटना सोमवारी रात्री घडली. यावेळी दोन्ही गटातील युवकांनी दोन-तीन दुकानांची तोडफोड केल्याने या परिसरात तणावाचे वातावरण निर्माण झाले होते; मात्र वेळीच पोलिसांचा ताफा पोहोचल्याने परिस्थिती नियंत्रणात आणण्यात आली.
भीमनगर चौकातील चहाच्या दुकानांसह काही खाद्यपदार्थांच्या दुकानावरही परिसरातील काही युवकांनी लोखंडी पाइप व काठय़ांनी हल्ला चढवून दुकानातील साहित्यांची तोडफोड केली. या घटनेनंतर परिसरात नागरिकांमध्ये धावपळ झाली. हा वाद नेमका कशामुळे झाला, याबाबत पोलिसांकडे कुठलीच माहिती नव्हती; मात्र सूत्रांनी दिलेल्या माहितीवरून हा वाद मुलीच्या छेडखानीवरून झाल्याची माहिती आहे. या घटनेनंतर शहर पोलीस उपअधीक्षक उमेश माने पाटील आणि ठाणेदार अनिल ठाकरे यांनी घटनास्थळ गाठून परिस्थितीची पाहणी केली.