सभापती, उपसभापतीची निवडणूक २ सप्टेंबरला

तेल्हारा कृषी उत्पन्न बाजार समितीची निवडणूक

तेल्हारा - कृषी उत्पन्न बाजार समिती तेल्हाराच्या रिक्त झालेल्या सभापती, उपसभापती पदाची निवडणूक २ सप्टेंबरला बाजार समितीच्या सभागृहात होणार आहे.
तेल्हारा कृषी उत्पन्न बाजार समितीवर शेतकरी पॅनल, भाजप, भारिप-बमसं या संयुक्त आघाडीने विजय संपादन केल्यानंतर अडीच वर्षाच्यावर कालावधी झाल्यानंतर ठरल्याप्रमाणे संदीप खारोडे यांनी सभापती पदाचा व रामकृष्ण नागोलकार यांनी उपसभापती पदाचा राजीनामा दिला. शेतकरी पॅनलचे नेते अण्णासाहेब बिहाडे, भारिप-बमसंचे नेते प्रदीप वानखडे, भाजपा तालुकाध्यक्ष राजाभाऊ राजनकर यांच्या प्रमुख उपस्थितीत संयुक्त आघाडीतील सर्व संचालकाच्या उपस्थितीत झालेल्या बैठकीनंतर सभापती, उपसभापती पदाचा राजीनामा दिल्याने रिक्त झालेल्या पदाची निवडणूक २ सप्टेंबरला बाजार समितीत बोलावण्यात आलेल्या विशेष सभेत होणार आहे.
शेतकरी पॅनल, भाजप, भारिप-बमसं या तिघांमध्ये ठरल्याप्रमाणे उर्वरित कालावधीकरिता सभापतीपद भारिप-बमसं व उपसभापतीपद भाजपकडे जाण्याची शक्यता व्यक्त केली जात आहे. यामध्ये सभापती व उपसभापती पदी कुणाची वर्णी लागते; याकडे सर्वांचे लक्ष लागलेले आहे.