परिश्रमाची तयारी असेल तर ‘किचन’ मध्ये करिअर

प्रख्यात शेफ विष्णू मनोहर यांच्या तरुणाईला टिप्स.

बुलडाणा : कर्तृत्वापुढे गगन ठेंगणे असे म्हटले जाते. त्यामुळे तुमच्यामध्ये क्षमता असेल, परिश्रम करण्याची तयारी असेल तर किचन मध्ये करिअर करण्यासाठी पुढे या, असे आवाहन प्रख्यात शेफ विष्णू मनोहर यांनी तरुणाईला केले. लोकमत सखी मंचच्या वतीने आयोजित कार्यक्रमासाठी ते बुलडाण्यात आले असता त्यांनी लोकमत कार्यालयात संवाद साधला.

प्रश्न : या क्षेत्रात कसे आलात, वारसा होता का ?
वारसा नाही, माझा कल कलाक्षेत्राकडे अधिक होता. आई संगीत शिक्षिका, त्यामुळे तिला मी त्यांच्या क्षेत्रात यावे, असे वाटायचे; मात्र सर्वात महत्त्वाचे म्हणजे खाण्याची आवड सर्वाधिक; परंतु खाताखाता मी हे पदार्थ बनवेल, असे कधी वाटले नाही. कलेची आवड असल्याने मी लग्नामध्ये नवरदेव-नवरीची थर्माकोलची नावे कापण्याचे काम सुरू केले. पन्नास रुपये मिळायचे व लग्नात जेवायलाही मिळायचे. त्यामधून मग एका कॅटरिंगवाल्यासोबत मैत्री झाली. त्याला मदत करायला लागलो. त्यामधून बरेच शिकता आले व पुढे करिअर म्हणून याच क्षेत्रात उतरलो.

प्रश्न :गुरू कोण, शास्त्रोक्त प्रशिक्षण घेतले का ?
प्रशिक्षण कुठेच घेतले नाही. कॅटरिंगवाल्यासोबत काम करताना एकदा त्याच्यासोबत वाद झाला व त्याच्या जिद्दीवर मी माझ्या एका मित्राच्या भावाच्या लग्नाचे रिसेप्शनचे काम घेतले. २५0 लोकांचे जेवण तयार करून घेतले. कार्यक्रम यशस्वी झाला त्यामुळे हुरूप वाढला. या क्षेत्रात काम करायचे ठरविल्यावर आपल्याला पदार्थ आले पाहिजेत ही भावना प्रबळ झाली त्यामुळे मग मी शिकत गेलो. शेकडो गुरू आहेत. अनेकांकडून विविध पदार्थ बनविण्याची कला शिकलो.

प्रश्न : करिअर म्हणून या क्षेत्रात किती संधी आहे?
खूप मोठी संधी आहे. फक्त मेहनत करण्याची तयारी हवी. हॉटेल मॅनेजमेंटचा कोर्स करून सुटाबुटात मॅनेजर होण्यापेक्षा किचनमध्ये या. येथे काम करण्यास खूप स्कोप आहे. अनेक पदार्थ आहेत ज्यामध्ये तुम्ही तुमच्या ज्ञान व कौशल्यामधून त्या पदार्थाची चव व स्वरूप बदलू शकता. आजच्या काळात या व्यवसायात अनेक संधी आहेत. दररोज नवनवीन हॉटेल्स तयार होतात. जोपर्यंत मानवाचे खाण्यावर प्रेम आहे तोपर्यंत हा व्यवसाय अजरामर आहे. आता या व्यवसायाला ग्लॅमर मिळाले आहे; मात्र यामागची मेहनत मोठी आहे. ती समजून घेणे गरजेचे आहे.

प्रश्न : महिलांपेक्षा पुरुषांना ह्यशेफह्ण म्हणून लोकप्रियता कमी आहे का ?
असे म्हणता येणार नाही; मात्र महिला शेफ यांचे प्रमाण कमी आहे हे सत्य आहे. आपल्या घरात अतिशय सुगरण असणार्‍या अनेक गृहिणी आहेत; मात्र घरी करणे, आवड आहे म्हणून पदार्थ करणे व व्यवसाय म्हणून या क्षेत्रात काम करणे यामध्ये खूप अंतर आहे. कदाचित त्यामुळेच ह्यशेफह्ण म्हणून महिला कमी आहेत, असे मला वाटते. कदाचित काही वेगळी कारणे असतील तर शोध घेतला पाहिजे.

प्रश्न : हॉटेल मॅनेजमेंट प्रशिक्षणामध्ये काही बदल व्हावे असे वाटते का ?
हो ! अजूनही हॉटेल मॅनेजमेंटच्या प्रशिक्षणात प्रादेशिक पदार्थ शिकविले जात नाहीत. अभ्यासक्रमात असलेल्या रेसिपी वर्षानुवर्ष तशाच आहेत. यामध्ये आता नावीन्य आले पाहिजे. प्रादेशिक पदार्थांना स्थान दिले पाहिजे. त्यामुळे आपल्याकडच्या रेसिपींनाही ग्लॅमर मिळेल.