पत्नीचा छळ करणा-या पतीसह दोघे कारागृहात

दोन्ही आरोपींना शनिवारी न्यायालयात हजर केले असता, न्यायालयाने त्यांची कारागृहात रवानगी केली.

अकोला, दि. १८- दारू पिण्यासाठी पैसे मिळावे म्हणून पत्नीला जबरदस्तीने शेजार्‍याच्या घरी भांडे घासण्यासाठी पाठविल्यानंतर या महिलेवर अत्याचार करणार्‍या तिच्या पतीसह शेजार्‍याच्या इसमास अकोट फैल पोलिसांनी अटक केली. दोन्ही आरोपींना शनिवारी न्यायालयात हजर केले असता, न्यायालयाने त्यांची कारागृहात रवानगी केली. अकोट फैल पोलीस स्टेशन अंतर्गत एका परिसरातील ४0 वर्षीय विवाहिता मुले व पतीसोबत राहते. ती आजूबाजूच्या काही घरी भांडी घासणे व घरकाम करते. अशातच मुलांच्या उदरनिर्वाहाचा प्रश्न या महिलेवरच आला. त्यामुळे नागेश कैलास लोखंडे (३६) याच्याकडे ती भांडी घासण्याचे काम करीत होती. या महिलेचा नागेश लोखंडे यानेही छळ केला. या प्रकाराला वैतागलेल्या त्या विवाहितेने पतीसह नागेश लोखंडेविरोधात अकोट फैल पोलीस स्टेशनला तक्रार दिली. पोलिसांनी चौकशी करून दोघांनाही अटक केली. त्यांना न्यायालयासमोर हजर केले असता न्यायालयाने दोघांनाही शनिवारपर्यंंंत पोलीस कोठडी व शनिवारी पोलीस कोठडी संपल्याने आरोपींना न्यायालयासमोर हजर केले असता, न्यायालयाने त्यांची कारागृहात रवानगी केली.