सायकल रॅलीतून दिला पर्यावरण रक्षणाचा संदेश!

पालकमंत्र्यांनी दाखविली हिरवी झेंडी; हितेंद्र महाजन ठरले आकर्षण, जिल्हाधिकार्‍यांसह गणमान्य नागरिकांचा सहभाग.

अकोला : पर्यावरण संरक्षणार्थ रविवारी सकाळी आयएमए सभागृह येथून सायकल रॅली काढण्यात आली. पालकमंत्री डॉ. रणजित पाटील सकाळी ८ वाजता रॅलीला हिरवी झेंडी दाखवली. रॅलीचे नेतृत्व आंतरराष्ट्रीय ख्यातीचे सायकलपटू डॉ. हितेंद्र महाजन यांनी केले. पर्यावरणाला आपल्या तसेच शहराच्या आरोग्याला आणि सर्वांंच्या खिशाला पोषक अशा सायकलचा वापर दैनंदिन व्यवहारात वाढावा, रस्त्यावरील आवागमनात सुरक्षितता यावी, या अनुषंगाने भारतीय बधिरीकरणशास्त्र तज्ज्ञ परिषद, इंडियन मेडिकल असोसिएशन, जिल्हाधिकारी कार्यालय, एलआरटी कॉलेज यांच्या संयुक्त विद्यमाने रविवार, १ नोव्हेंबर रोजी सकाळी ८ वाजता आयएमए हॉल येथून सायकल रॅली काढण्यात आली. पालकमंत्री डॉ. पाटील यांनी हिरवी झेंडी दाखविल्यानंतर ही रॅली आयएमए सभागृह येथून गोरक्षण रोड मार्गे कौलखेड, सिंधी कॅम्प, अशोक वाटिका, जिल्हा न्यायालय येथे पोहोचली. येथून बिर्ला रोड, सातव चौक, जठारपेठ चौक मार्गे राऊतवाडी, जवाहरनगर चौक मार्गे सिव्हिल लाइन चौक येथे पोहोचली. रॅलीचा समारोप एलआरटी महाविद्यालयाच्या प्रांगणात करण्यात आला. यावेळी जिल्हाधिकारी जी. श्रीकांत तसेच आंतरराष्ट्रीय ख्यातीचे सायकलपटू डॉ. हितेंद्र महाजन यांची प्रमुख उपस्थिती होती. त्यांनी ह्यरेस अँक्रॉस अमेरिकाह्ण ही ४८६0 किमी अंतराची खडतर स्पर्धा प्रथमच भारताला जिंकून दिली आहे.