लग्नाच्या शूटिंगसाठी ड्राेन वापरणार असाल तर सावधान

अकाेला : अकाेला शहर व परिसरात प्री - वेडिंग, वेडिंग शूटसाठी ड्रोनचा वापर अलीकडे वाढताना दिसत आहे. मात्र, ड्रोन उड्डाण करताना सुरक्षिततेच्या दृष्टीने खबरदारी घेणेही तितकेच आवश्यक आहे. ड्रोनचा वापर करावयाच्या नियमांचे पालन करणे बंधनकारक असून, या नियमांचे पालन न केल्यास ड्राेन चालकासह संबंधितांवर फाैजदारी कारवाई हाेण्याची शक्यता आहे. त्यामुळे लग्नाच्या शूटिंगसाठी ड्राेन वापरणार असाल तर आता सावधान हाेण्याची गरज आहे. उत्कृष्ट छायाचित्रणासाठी प्री - वेडिंगच्या शूटिंगकरिता ड्रोनच्या वापरास प्राधान्य दिले जाते. ड्रोनद्वारे शूट केलेले व्हिडिओ चांगल्या दर्जाचे येत असल्याने त्याला पसंती दिली जात आहे. जिल्ह्यातील वेगवेगळ्या नैसर्गिक ठिकाणांसह प्राचीन मंदिरांचा परिसर, अभयारण्य तसेच घाटमार्गाला यासाठी पसंती दिली जात आहे. दरम्यान, ड्रोन वापरण्यापूर्वी काही नियमांची माहिती असणे आवश्यकच आहे. पाेलिसांकडून याबाबत अद्याप तरी अधिसूचना काढण्यात आलेली नसली तरी ड्रोनचा वापर करण्याअगोदर ‘डीजीसीए’च्या (डायरेक्टर जनरल ऑफ सिव्हिल एव्हिएशन) नियमानुसार जवळच्या पोलीस ठाण्याला लेखी पूर्वकल्पना देणे आवश्यकच आहे.

ड्रोन उडविण्यासाठी प्रमाणपत्र हवे

१ ड्रोन उडविण्याकरिता सर्वप्रथम डीजीसीएच्या मान्यताप्राप्त केंद्राकडून आठवडाभराचे प्रशिक्षण घेणे आवश्यक आहे.

२ प्रशिक्षण पूर्ण केल्यानंतर या संस्थेकडून प्रमाणपत्र दिले जाते. या प्रमाणपत्राच्या आधारे ड्रोन उड्डाण करता येऊ शकताे.

३ परवाना प्राप्त होईपर्यंत प्रशिक्षण घेतलेली व्यक्ती प्रमाणपत्राच्या आधारे ड्रोनचा वापर सुरू ठेवू शकते.

४ विना प्रशिक्षण, विना परवाना ड्रोन उडविणे अवैध असून, पोलिसांकडून कारवाईदेखील केली जाऊ शकते.

वापरण्याचेही नियम

संरक्षण खात्याशी संबंधीत सर्व केंद्रांचा परिसर सुमारे तीन किलोमीटरपर्यंत प्रतिबंधित क्षेत्र म्हणून जाहीर केलेला असतो.

सुरक्षिततेच्या दृष्टीने जिल्ह्यातील धरणांच्या परिसरात ड्रोन वापरण्यावर प्रतिबंध घालण्यात आला आहे.

विमानतळाच्या परिसरात तसेच हवाई धावपट्टीच्या भागातसुध्दा ड्रोन वापरावर पूर्णपणे बंदी घातलेली आहे.

ड्रोनचा प्रकार व ड्रोन उड्डाण करणाऱ्या पायलटची डीजीसीएकडे नोंदणी प्रशिक्षण आवश्यक आहे.

नॅनो ड्रोन हा केवळ ५० फूट अर्थातच १५ मीटर उंचीपेक्षा जास्त उडविता येत नाही. तसे केल्यास नियमाचा भंग ठरतो.

मायक्रो ड्रोन हा २०० फूट (६० मीटर) उंचावरच उडविता येतो, त्यापेक्षा जास्त उंचीवर उडविणे अवैध ठरते.

असे आहेत ड्रोनचे प्रकार

नॅनो- ० ते २५० ग्रॅमपेक्षा कमी वजन.

मायक्रो २५१ ग्रॅम ते २.५ किलोपर्यंत वजन.

स्मॉल २५ किलोपर्यंत वजन, मीडियम २५ ते १५० किलोपर्यंत वजन.

लार्ज १५० किलोपासून पुढे

ड्रोन उड्डाणापूर्वी डीजीसीए मान्यताप्राप्त कंपनीकडून प्रशिक्षण घेणे अनिवार्य आहे. आठवड्याचे प्रशिक्षण घेतल्यानंतर या संस्थेकडून प्रमाणपत्र दिले जाते. ड्रोनचा वापर हा कायद्यानेच करायला हवा. रेड, ऑरेंज, ग्रीन झोन विचारात घ्यावे. ड्रोन केवळ ग्रीन झोनमध्येच उडविला जावा. संवेदनशील क्षेत्रात कोठेही ड्रोनचा वापर करू नये, जेणेकरून सुरक्षिततेचा मुद्दा निर्माण होईल.

जी. श्रीधर

पाेलीस अधीक्षक, अकाेला

पाेलिसांच्या विविध संस्थांच्या हद्दीत संरक्षण खात्याशी संबंधीत तसेच पोलीस खात्याशी संबंधीत विविध आस्थापनांचे संवेदनशील क्षेत्र अस्तित्त्वात आहे. यामुळे अशा हद्दीत ड्रोनचा वापर करणे कटाक्षाने टाळायला हवे. ड्रोनचा वापर करण्यापूर्वी जवळच्या पोलीस ठाण्याला लेखी कल्पना देणे आवश्यक आहे. डीजीसीएकडून परवानगी घेऊनच ड्रोन उड्डाण करावे.

माेनीका राऊत

अपर पाेलीस अधीक्षक, अकाेला