अकाेला : डॉ. पंजाबराव देशमुख कृषी विद्यापीठ, अकोला यांनी कृषी पर्यटन विकास या क्षेत्रामधील संधींचा प्रसार व प्रचार होण्याच्या दृष्टीने कृषी पर्यटन विकास संस्था, पुणे यांचे समवेत कुलगुरू डॉ. शरद गडाख यांचे उपस्थितीमध्ये सामंजस्य करार केला आहे. सदर सामंजस्य करार अंतर्गत विद्यापीठाच्या प्रक्षेत्रावर कृषी पर्यटन केंद्र विकसित करून त्यासाठी प्रशिक्षण केंद्र सुद्धा सुरू करण्याचे प्रस्तावित आहे.
कृषी पर्यटन विकास संस्था आणि विद्यापीठाद्वारे कृषी पर्यटनाला एकत्रितरित्या एक यशस्वी कृषी व्यवसाय म्हणून नाव रूपास आणण्याचे ध्येय आहे. कृषी पर्यटन विकास संस्था, पुणे यांनी महाराष्ट्रामध्ये जवळपास साडेसहाशे कृषी पर्यटन केंद्रांचे जाळे निर्माण केले आहे आणि सदर संस्थेने कृषी पर्यटन विकासाचे विविध प्रकारचे मॉडेल्स विकसित केले आहे. कृषी पर्यटन या क्षेत्रातील संधींकरिता तसेच कौशल्य विकास च्या दृष्टीने पदयुत्तर पदविका अभ्यासक्रम सुद्धा सुरू करण्याचे प्रस्तावित असल्याचे यावेळी सांगण्यात आले.
करारावेळी विद्यापीठाचे संशोधन संचालक डॉ. विलास खर्चे, संचालक विस्तार शिक्षण डॉ. धनराज उंदीरवाडे, विद्यापीठाचे कुलसचिव डॉ. सुरेंद्र काळबांडे, कृषी पर्यटन विकास संस्था पुणे यांचे व्यवस्थापकीय संचालक पांडुरंग तावरे , सदस्य अरुण क्षीरसागर, पायगुडे आणि बलकवडे, कृषी पद्धती व पर्यावरण केंद्राचे संचालक डॉ. राजेंद्र इसाळ, कुलगुरू यांचे तांत्रिक सचिव डॉ. नितीन कोष्टी , सहयोगी संशोधन संचालक अजय सदावर्ते, एकात्मिक शेती पद्धती केंद्राचे मुख्य शास्त्रज्ञ डॉ. जयंत देशमुख, कृषी पद्धती व पर्यावरण केंद्राचे सहाय्यक प्राध्यापक डॉ. नितीन कोंडे आदी उपस्थित होते.