४.५0 लाखांची घरफोडी

अकोला काँग्रेस नगरातील घरामध्ये मध्यरात्रीच्या सुमारास अज्ञात चोरट्यांनी ४ लाख ३८ हजार रुपयांची घरफोडी केल्याचे उघडकीस आले.

अकोला: काँग्रेस नगरातील घरामध्ये शनिवारी मध्यरात्रीच्या सुमारास अज्ञात चोरट्यांनी घुसून ४ लाख ३८ हजार रुपयांची घरफोडी केल्याचे शनिवारी उशिरा रात्री उघडकीस आले. याप्रकरणी खदान पोलिसांनी गुन्हा दाखल केला. मोनिका रॉबिन साळवे (५२) यांनी दिलेल्या तक्रारीनुसार १४ जून रोजी रात्री ८.३0 वाजता घरातील दरवाजाला कुलूप लावून त्या मुलांसोबत जेठ कॅनिक साळवे यांच्या घरी गेल्या. तेथून ९.३0 वाजताच्या सुमारास घरी परतल्यावर त्यांना घरातील दिवे सुरू दिसले. त्यांनी घरात जाऊन पाहिल्यावर बेडरूमधील कपाटातील सर्व साहित्य पसरलेले दिसून आले. अज्ञात चोरट्यांनी घरातील कपाटातील ४0 ग्रॅमचे सोन्याचे मंगळसूत्र, २0 ग्रॅमचे मंगळसूत्र, १५ ग्रॅमचे सोन्याचे ब्रासलेट, ६0 ग्रॅमच्या सोन्याच्या बांगड्या, ३0 ग्रॅमच्या ६ अंगठय़ा, प्रत्येकी ३ ग्रॅमचे १0 टॉप्स आणि रोख १५ हजार रुपये असा एकूण ४ लाख ३८ हजार रुपयांचा ऐवज लंपास केला. सोबतच चोरट्यांनी घरातील व्हिडिओ गेम, सोनीचा कॅमेरा, सोनीचा व्हिडिओ गेम, ६ जुने मोबाईलसुद्धा लंपास केले. मोनिका रॉबिन साळवे यांच्या तक्रारीनुसार खदान पोलिसांनी अज्ञात चोरट्यांविरुद्ध भादंवि कलम ४५७, ३८0 नुसार गुन्हा दाखल केला. घटनास्थळावर पोलिसांनी श्‍वानपथक व फिंगर प्रिंट तज्ज्ञांना पाचारण केले होते; परंतु त्याचा विशेष फायदा झाला नाही. पोलिस श्‍वान तर चोरट्यांचा माग काढण्यात अयशस्वी ठरले.