श्रीगोंद्यात तहसीलदारांसमोरच शाब्दिक चकमक

श्रीगोंदा : तहसील कार्यालयात रेशनकार्डची किंमत दोनशे ते पाचशे रुपये झाली आहे. त्यामुळे दाम देणार त्याचे काम ताबडतोब होणार, अशी प्रथा येथे पडली आहे. इतर नागरिक सहा महिन्यांपासून प्रतीक्षा यादीत आहेत. या प्रकारामुळे बुधवारी तहसीलदार प्रदीप पवार यांच्या समोरच अधिकाऱ्यांमध्ये शाब्दिक चकमक उडाली.

श्रीगोंदा तालुक्यात दरमहा तीनशे ते साडेतीनशे नवीन अथवा दुबार रेशनकार्डची मागणी होते. मात्र, शासनाकडून दोनशेच नवीन रेशनकार्ड मिळतात. त्यामध्ये लवकर कार्ड मिळण्यासाठी काही जण हस्तक्षेप करतात. त्यामुळे रेशनकार्ड वितरणात काळाबाजार होतो. या काळ्या बाजारात सामान्य नागरिक भरडला जात आहे. त्याचे पडसाद बुधवारी उमटले.

पुरवठा विभागात दत्तात्रय साळुंके हे एकटेच पुरवठा निरीक्षक आहेत. त्यांच्या हाताखाली एकही लेखनिक नाही. त्यामुळे त्यांना झीरो कर्मचारी नेमून हे काम करावे लागते. त्यामुळे रेशनकार्ड वितरणात काळा बाजार होत आहे. या विभागातील रिक्त पदे भरणे आवश्यक आहे.

रेशनकार्ड वितरणाचा वाद तहसीलदार प्रदीप पवार यांच्या दरबारात गेला. त्यावर पुरवठा निरीक्षकाने एका नायब तहसीलदारावर शब्दांचा भडीमार केला.

---

तहसील कार्यालयात नऊ पदे रिक्त आहेत. त्यामुळे अडचणी निर्माण झाल्या आहेत. अशा परिस्थितीत नागरिकांची कामे थांबू नयेत. दक्षता घेतली जात आहे. पुरवठा विभागातील रेशनकार्ड वितरणाचा आढावा घेऊन प्रलंबित रेशनकार्ड लवकर देण्याची व्यवस्था केली जाईल.

प्रदीप जाधव,

तहसीलदार, श्रीगोंदा.