कुलकर्णी यांना वेदभूषण, तर लोणकर यांना समाजभूषण पुरस्कार

पाथर्डी : श्री लक्ष्मी नृसिंह प्रतिष्ठान व सार्वजनिक गणेश मंदिर ट्रस्टच्या संयुक्त विद्यमाने पाथर्डीतील श्रुती माऊली वेदपाठशाळेचे प्रा. वेदमूर्ती सर्वेश्वरशास्त्री कुलकर्णी यांना वेदभूषण, तर दौंड तालुक्यातील केडगाव येथील स्वा. सावरकर युवा विचार मंचचे अध्यक्ष डॉ. नीलेश लोणकर यांना समाजभूषण पुरस्काराने सन्मानित करण्यात आले. समाजात निरपेक्षतेने कार्य करणाऱ्या व्यक्तींना हा पुरस्कार प्रतिष्ठानतर्फे दिला जातो. कसबा पेठेतील प्राचीन उजवी सोंड असणाऱ्या गणेश मंदिराच्या जीर्णोद्धार पुस्तिकेचे प्रकाशन व भूमिपूजन मुकुंदकाका जाटदेवळेकर, माधवबाबा, वास्तू विशारद अजय कुलकर्णी, दादाजी आगटे, माजी नगराध्यक्ष अभय आव्हाड, अंकुश पालवे, नितीन एडके, राहुल कारखेले यांच्या हस्ते कार्यास प्रारंभ करण्यात आला.

श्री लक्ष्मीनृसिंह प्रतिष्ठान आयोजित राज्यस्तरीय ऑनलाईन श्रीमद्‌भगवतगीता पाठांतर स्पर्धेतील विजेती प्रतिभा शेळके, मन केला, मीत केला, मंजूषा अगस्ते, सुलभा श्रोत्रीय आदींचा सन्मान करण्यात आला. यावेळी १५० महिलांची रक्त तपासणी करण्यात आली. तपासणी केलेल्या सर्व महिलांचा फ्री चेक अप व फ्री ट्रीटमेंट श्री धन्वंतरी चिकित्सालयातर्फे करण्यात आल्याची माहिती प्रतिष्ठानच्या सचिव डॉ. ज्योती देशमुख यांनी दिली.

प्रास्ताविक प्रतिष्ठानचे अध्यक्ष डॉ. श्रीधर देशमुख, स्वागत गणेश मंदिर ट्रस्टचे अध्यक्ष गोविंदजी महाराज, सन्मानपत्राचे वाचन अविनाश मंत्री तर डॉ. ज्ञानेश्वर दराडे यांनी आभार मानले.

यावेळी नगरसेवक बंडू बोरुडे, महेश बोरुडे, डॉ. दिगंबर भराट, जगदीश मुने, राजेंद्र भोसले, संतोष लबडे, गणेश सोनटक्के, रमण लाहोटी, अजिनाथ कर्डीले आदी उपस्थित होते. कार्यक्रम यशस्वीतेसाठी अमोल मुळे, सचिन रत्नपारखे, मंजिरी घायाळ आदींनी परिश्रम घेतले.

फोटो : २४ पाथर्डी

पाथर्डी येथे प्रा. वेदमूर्ती सर्वेश्वरशास्त्री कुलकर्णी यांना वेदभूषण तर डॉ. नीलेश लोणकर यांना समाजभूषण पुरस्काराने सन्मानित केले.