प्रवरेतून जायकवाडीकडे झेपावले एक टीएमसी

पाचेगाव : भंडारदरा आणि मुळा धरणाच्या लाभक्षेत्रात गत दहा दिवसापासून झालेल्या पावसामुळे प्रवरा नदी वाहती झाली. १ जुलैपासून ते २१ जुलैपर्यंत प्रवरेतून एक टीएमसीपेक्षा अधिक पाणी जायकवाडीकडे झेपावले आहे.

गतवर्षीप्रमाणेच यंदाही वरुणराजाने लाभक्षेत्रावर मेहेरबानी दाखविली. सरासरीपेक्षा अधिक पाऊस लाभक्षेत्रात नोंदला गेला. यंदा जुलैच्या सुरुवातीलाच प्रवरा वाहती झाली. नेवासा येथील मध्यमेश्वर बंधाऱ्यावरील जलमापकावर दि. २१ जुलै रोजी नोंदविलेल्या आकडेवारीनुसार तब्बल ११४९ दलघफू पाणी जायकवाडीत सामावले आहे. गतवर्षी संपूर्ण मोसमात प्रवरेतून जायकवाडीसाठी तब्बल ४५ टीएमसी वाहिले होते. प्रवरेतून जायकवाडीच्या दिशेने सध्या ४५६ क्युसेकने पाण्याची आवक सुरू असून, लाभक्षेत्रात अधिक पाऊस झाल्यास नदीच्या पाणीपातळीत वाढ होण्याची शक्यता आहे.

बुधवारी सकाळच्या आकडेवारीनुसार मुळा धरणात ४० टक्के, भंडारदरा धरणात ५० टक्के, तर निळवंडे धरणात १९ टक्के पाणीसाठा झालेला होता. वरील धरणाच्या पाणलोटातही गत तीन-चार दिवसापासून पावसाचे धूमशान सुरू असून, तीनही धरणाच्या पाणीपातळीत झपाट्याने वाढ होत आहे. त्यामुळे ही धरणे लवकरात लवकर भरावीत, अशी अपेक्षा लाभक्षेत्रातील शेतकऱ्यांची आहे.