ब्रिटनमधून आलेल्यांपैकी २० जण निगेटिव्ह

अहमदनगर : ब्रिटनमधून जिल्ह्यात आलेल्या २५ प्रवाशांपैकी २० जणांचा कोरोना चाचणी अहवाल निगेटिव्ह आला आहे. आणखी पाच जणांच्या अहवालाची प्रतीक्षा आहे. दरम्यान, सार्वजनिक ठिकाणी वावरताना नागरिकांनी मास्क वापरावा, असे आवाहन जिल्हाधिकारी डॉ. राजेंद्र भोसले यांनी केले आहे.

ब्रिटनमधील काही भागात कोरोना विषाणूच्या जनुकीय रचनेत काही बदल झालेला नवीन विषाणू आढळला असून या विषाणूचा प्रसार नेहमीपेक्षा अधिक वेगाने होऊ शकतो, असे तज्ज्ञांचे मत आहे. या पार्श्वभूमीवर शासनाकडून मिळालेल्या सूचनेप्रमाणे राज्यात २५ नोव्हेंबर ते २३ डिसेंबर या काळात ब्रिटनमधून आलेल्या प्रवाशांचे विशेष सर्वेक्षण करण्यात आले. राज्य शासनाच्या आरोग्य विभागाकडून २५ नोव्हेंबर ते २३ डिसेंबर या काळात ब्रिटनमधून परतलेल्या व अहमदनगर जिल्ह्यात वास्तव्यास असलेल्या २५ व्यक्तींची यादी जिल्हा प्रशासनास प्राप्त झालेली आहे. या यादीनुसार जिल्ह्यात विशेष सर्वेक्षणाअंती १९ व्यक्ती या अहमदनगर महानगरपालिका हद्दीतील तर ६ व्यक्ती ग्रामीण भागातील आढळून आलेल्या आहेत. या २५ व्यक्तींपैकी २० व्यक्तींची आर. टी. पी. सी. आर. तपासणी करण्यात आली असून त्यांचे अहवाल निगेटिव्ह आलेले आहेत. उर्वरीत ५ व्यक्तींचे आर.टी.पी.सी.आर. तपासणीसाठी नमुने घेण्यात आले असून तपासणी अहवाल अद्याप अप्राप्त असल्याची माहिती जिल्हाधिकारी डॉ. राजेंद्र भोसले यांनी दिली.

---

२५ नोव्हेंबर २०२० नंतर ब्रिटनमधून परतलेले आहेत, अशांनी स्वतःहून अहमदनगर महानगरपालिका,

जिल्हयाच्या सार्वजनिक आरोग्य विभागास संपर्क साधून या सर्वेक्षणात सहकार्य करावे. कोरोना विषाणूचा प्रादुर्भाव रोखणेकामी मास्कचा वापर, सॅनिटायझरचा वापर करावा व सामाजिक अंतराच्या निकषांचे पालन करावे.

-डॉ. राजेंद्र भोसले, जिल्हाधिकारी