जामखेड-करमाळा मार्गावर सायंकाळी साडेपाचनंतर बसच नाही

जवळा : जामखेड-करमाळा मार्गावर सायंकाळी साडेपाचनंतर एकही बस नसल्याने या मार्गावर असलेल्या गावांमधील प्रवाशांचे हाल होत आहेत. त्यामुळे या मार्गावर पुन्हा पूर्वीप्रमाणे बस सुरू कराव्यात, अशी मागणी गावकऱ्यांनी केली आहे.

जामखेड-करमाळा रस्त्यावर तालुक्यातील जवळा, नान्नज, चुंबळी, पाडळी, झिक्री, धोंडपारगाव, बोर्ले या गावांबरोबरच करमाळा तालुक्यातील आळजापूर, बिटरगाव, पोथरे ही गावेही येतात. मात्र, कोरोना महामारीच्या पार्श्वभूमीवर काही महिन्यांपूर्वी एसटी बस सेवा खंडित झाल्यानंतर करमाळा मार्गावरील दुपारी साडेपाचनंतर एसटीच्या फेऱ्या सुरू करण्यात जामखेड आगाराने दुर्लक्ष केले आहे.

जामखेड आगारातून दुपारी साडेपाच वाजता करमाळा आगाराची शेवटची बस या मार्गावरून जाते. यानंतर मात्र जवळा, नान्नज, करमाळा या ठिकाणी जाण्यासाठी एकही बस नसल्याने प्रवाशांची खूपच गैरसोय होत आहे.

जामखेड आगाराची पावणेसात वाजताची करमाळा मुक्कामी व साडेआठ वाजताची जवळा मुक्कामी या दोन बस गेली चाळीस वर्षांहूनही अधिक काळ नियमित सुरू आहे. या दोन्ही बसला प्रवाशांचा चांगला प्रतिसाद होता. मात्र, कोरोनाचे कारण देत या बस गेल्या तीन महिन्यांपासून विनासूचना बंद करण्याचा प्रकार घडला आहे. सध्या सार्वजनिक प्रवासी वाहतूक पूर्ण क्षमतेने चालविण्यास मुभा असताना बस बंद असल्याने प्रवाशांची गैरसोय होत आहे.

जामखेड आगाराची जवळा ते नगर ही जवळा मुक्काम असलेली बसही बंद झाल्याने जवळा, हळगाव, पिंपरखेड, अरणगावहून नगरला जाणाऱ्या प्रवाशांची गैरसोय झाली.

----

उत्पन्नाअभावी जामखेड डेपोच्या अनेक गाड्या बंद आहेत. मात्र, प्रवाशांची गैरसोय टाळण्यासाठी करमाळा व जवळा मुक्कामी बस सुरू करण्यात येतील.

- महादेव शिरसाठ,

आगारप्रमुख, जामखेड

-----

करमाळा व जवळा मुक्कामी बस पुन्हा नियमित सुरू करण्याबाबत सूचना करणार आहे.

-विजय गिते

विभाग नियंत्रक,

राज्य मार्ग परिवहन महामंडळ, नगर