बोधेगावात सलून दुकानावर उसाची ट्राॅली उलटली

बोधेगाव : शेवगाव तालुक्यातील बोधेगाव येथील हातगाव फाट्यालगत असलेल्या एका सलून दुकानावर ऊस वाहतूक करणाऱ्या डबल ट्राॅली ट्रॅक्टरची मागील एक ट्राॅली उलटली. ही घटना बुधवारी (दि.२४) रात्री आठच्या सुमारास घडली. सुदैवाने जीवितहानी टळली; मात्र सलून दुकानासह तीन मोटरसायकलींचे नुकसान झाले आहे.

बोधेगाव येथील हातगाव फाट्याला तीव्र चढ पार करून पैठण मार्गे येणाऱ्या वाहनांना जागीच टर्न घेऊन शेवगाव-गेवराई मार्गावर यावे लागते. बुधवारी रात्री संत ज्ञानेश्वर कारखान्यासाठी ऊस वाहतूक करणारा एक डबल ट्राॅली ट्रॅक्टर येथून चढताना अवजड भारामुळे उतारावरून रिव्हर्स आला. यावेळी मागील एक ट्राॅली तोल जाऊन नजीकच्या बाळासाहेब भगवान गोरे यांच्या सलून दुकानावर उलटली. त्यावेळी दुकानात ग्राहकांच्या दाढी-कटींगचे काम सुरू होते. दुकानाचे समोरील पत्राशेड पूर्णतः उसाखाली दबले गेले. शटर मोडून आतील प्रवेशद्वाराच्या काचा फुटल्या. शेजारील टेलिफोनचा खांबही वाकला, तसेच दुकानासमोर उभ्या असलेल्या बाळासाहेब गोरे, दिनकर खोले, मुजीम सय्यद यांच्या तीन मोटरसायकलींचा उसाच्या ट्राॅलीखाली चेंगरून चुराडा झाला. दरम्यान, ट्रॅक्टरसह डबल ट्राॅली चढावरून मागे येत असल्याचे लक्षात येताच आरडाओरडा झाल्याने नजीकचे लोक दूर पळाले. यामुळे सुदैवाने जीवितहानी टळल्याचे प्रत्यक्षदर्शींकडून समजते. घटनेची माहिती मिळताच पोलीस काॅन्स्टेबल उमेश गायकवाड यांनी घटनास्थळी धाव घेऊन पंचनामा केला. घटनास्थळी बघ्यांची मोठी गर्दी झाली होती. पोलिसांनी रात्री उशिरा घटनेतील ट्रॅक्टरसह मोटरसायकली ताब्यात घेतल्या.

-----

अपघातांचे दुर्लक्षित ब्लॅक स्पाॅट..

शेवगाव-गेवराई मार्गावरील हातगाव फाटा, बन्नोमाँ दर्गा परिसर, डाक बंगला चौक, काळा ओढ्यावरचा पूल, सोनविहीर फाटा, ठाकूर पिंपळगाव येथील धोकादायक वळण आदी ठिकाणे अपघातांचे ब्लॅक स्पाॅट बनलेले असून, येथे अनेकांना जीव गमवावा लागलेला आहे; मात्र अशा ब्लॅक स्पाॅटकडे संबंधित प्रशासनाचे वर्षानुवर्षे दुर्लक्षच होते.

फोटो ओळी २५ बोधेगाव शुगर

बोधेगाव येथील हातगाव फाट्यावरील सलून दुकानावर उलटलेली उसाची ट्राॅली व नुकसान झालेले सलून दुकान.