राज्य सरकार कोरोनाबाबतचे आकडे लपवत नाही

पारनेर : राज्य सरकार कोरोनाबाबतची कसलीही आकडेवारी लपवत नाही. आम्ही प्रामाणिकपणे आणि पारदर्शीपणे खरे आकडे जगासमोर मांडतो. त्याबाबत होणारे सर्व आरोप चुकीचे आहेत. रेड आणि ग्रीन झोनबाबत नियमावली कशी राहील याबाबत ३१ तारखेनंतरच निर्णय घेतला जाणार आहे, अशी माहिती ग्रामविकास मंत्री तथा पालकमंत्री हसन मुश्रीफ यांनी दिली.

मुश्रीफ यांनी बुधवारी सकाळी आमदार नीलेश लंके यांच्या नेतृत्वाखाली भाळवणी (ता.पारनेर) येथे सुरू असलेल्या शरदचंद्र पवार आरोग्य मंदिरास भेट दिली. यावेळी ते बोलत होते. यावेळी आमदार लंके, जिल्हाधिकारी डॉ. राजेंद्र भोसले, जिल्हा परिषदेचे उप मुख्य कार्यकारी अधिकारी जगन्नाथ भोर, प्रांताधिकारी सुधाकर भोसले, जिल्हा आरोग्य अधिकारी संदीप सांगळे, तहसीलदार ज्योती देवरे, तालुका आरोग्य अधिकारी डॉ. प्रकाश लाळगे, अ‍ॅड. राहुल झावरे, विक्रमसिंह कळमकर, राजेश्वरी कोठावळे, डॉ. बाळासाहेब कावरे, कारभारी पोटघन, बापूसाहेब शिर्के, अभयसिंह नांगरे, दत्ता कोरडे, मुकुंद शिंदे, डॉ. मानसी मानोरकर, दीपक लंके, बाळासाहेब खिलारी, प्रमोद गोडसे, संदीप चौधरी, सचिन पठारे, गणेश भापकर आदी उपस्थित होते. मुश्रीफ यांनी या कोविड सेंटरला यावेळी दोन लाखांची मदत जाहीर केली.

मुश्रीफ म्हणाले, एखादा लोकप्रतिनिधी स्वतःचा जीव धोक्यात घालून किती व कसे काम करू शकतो हे लंके यांनी राज्याला दाखवून दिले. आपली जनता दुःखी, कष्टी आहे. महामारीच्या फेऱ्यात अडकली आहे. तिला आधार देणे. तिच्या सोबत राहून हा संसर्गजन्य आजार आहे हे माहिती असतानाही दिवस-रात्र सेवा करणे सोपे नाही. ते व्रत त्यांनी घेतले आहे, असे गौरवोद्गार त्यांनी काढले.

लंके म्हणाले, जनतेसाठी शरद पवार यांच्या नावाने कोविड सेंटर सुरू केले. लोक या रोगाला घाबरले नाहीत. आत्मविश्‍वास, जिद्दीने त्याला तोंड दिले. हसतमुखाने परिस्थितीशी मुकाबला केला तर माणसाला काही होऊ शकत नाही. त्यासाठी आम्ही कोविड सेंटरमध्ये प्रयत्न केले, असे लंके यांनी सांगितले.

---

फोटो ओळी

भाळवणी येथील कोविड सेंटरची पाहणी करताना पालकमंत्री हसन मुश्रीफ, आमदार निलेश लंके व इतर.