हत्याकांडातील चौकशीनंतर शेळके याला अटक

अडीच वर्षांपूर्वी शहर सहकारी बँकेतील अपहार प्रकरणात शेळके याच्याविरुद्ध तीन स्वतंत्र गुन्हे दाखल आहेत. आर्थिक गुन्हे शाखेच्या माध्यमातून या प्रकरणाचा तपास सुरू आहे. गुन्हा दाखल झाल्यापासून शेळके फरार होता. दरम्यान, जरे हत्याकांडातील मुख्य सूत्रधार पत्रकार बाळ ज. बोठे याचा पोलीस गेल्या २४ दिवसांपासून शोध घेत आहेत. बोठे हा शेळके याच्या संपर्कात असल्याचा संशय पोलिसांना होता. स्थानिक गुन्हे शाखेच्या पथकाने शुक्रवारी पुणे येथे बोठे याचा शोध घेतला. बोठे सापडला नाही, मात्र शेळके सापडला. त्याची चौकशी पूर्ण झाल्यानंतर शनिवारी आर्थिक गुन्हे शाखेच्या पोलीस निरीक्षक ज्योती गडकरी यांनी शेळके याला अटक करून न्यायालयापुढे हजर केले होते. न्यायालयाने त्याला ३० डिसेंबरपर्यंत पोलीस कोठडीत ठेवण्याचा आदेश दिला. शेळकेच्या वतीने ॲड. महेश तवले यांनी काम पाहिले. शेळकेने शहर सहकारी बँकेतून कर्ज प्रकरण मंजूर करून घेताना कसा अपहार केला, या गुन्ह्यात आणखी कुणाचा सहभाग आहे. याच्या तपासासाठी पोलीस कोठडी देण्याची विनंती गडकरी यांनी केली होती.

दोषारोपपत्र कधी दाखल होणार

शहर सहकारी बँकेतील १७ कोटी २५ लाख रुपयांच्या अपहार प्रकरणात डॉ. नीलेश शेळके याच्यासह बँकेतील अधिकारी व संचालक मंडळाविरोधात गुन्हे दाखल आहेत. गुन्हा दाखल होऊन अडीच वर्षे लोटले आहेत, तरी याप्रकरणी अद्याप न्यायालयात दोषारोपपत्र दाखल झालेले नाही. फॅारेन्सिक ऑडिट बाकी असल्याने दोषारोपपत्र दाखल करता येत नसल्याचे तपासी अधिकारी सांगत आहेत. मात्र, हे फॅारेन्सिक ऑडिट कधी पूर्ण होणार, हाच मोठा प्रश्न आहे.