कोपरगाव : कोपरगाव तालुक्यातील ओगदी येथील एका शेतकरी कुटुंबावर शनिवारी (दि.९) पहाटे पावणे दोन वाजण्याच्या सुमारास तीन दरोडेखोरांनी घराचा दरवाजा दगडाने तोडून घरातील रोख रकमेसह कपाटातील दागिने असा एकूण ३ लाख १८ हजार रुपयांचा दरोडा टाकून मुद्देमाल लुटून नेला आहे. दरोडेखोरांनी घरात एकट्याच असलेल्या कमलबाई लक्ष्मण जोरवर (वय-४५) यांना लाकडी दांड्याने मारहाण करून जखमी केले आहे.
याप्रकरणी कमलबाई लक्ष्मण जोरवर ( रा. ओगदी ता. कोपरगाव) यांच्या फिर्यादीवरून अज्ञात दरोडेखोराविरुद्ध कोपरगाव तालुका पोलीस ठाण्यात गुन्हा दाखल करण्यात आला आहे. त्यांच्यावर शहरातील खासगी रुग्णालयात उपचार सुरु आहेत. पोलिसांनी दिलेल्या माहितीनुसार, कोपरगाव तालुक्यातील ओगदी येथे कमलबाई लक्ष्मण जोरवर ह्या आपल्या पती लक्ष्मण तुकाराम जोरवर यांच्या समवेत राहतात. शनिवारी रात्री त्यांचे पती हे शेतात पाणी भरण्यासाठी गेले होते. जाताना त्यांनी घराला बाहेरून कुलुप लावले होते. त्यांची पत्नी कमलबाई यांनी आतून दार लावून झोपल्या.
रात्री पावणे दोन वाजेच्या सुमारास तीन दरोडेखोरानी दरवाजाला असलेले कुलूप तोडले. त्यानंतरही दार उघडले नसल्याने दरोडेखोरांनी दार तोडण्यास सुरवात केली. त्यावर आत आलेल्या कमलाबाई जोरजोराने ओरडू लागल्याने दरोडेखोरांनी त्यांना दार उघडण्यास सांगितले. त्यास कमलबाई यांनी विरोध दर्शविला. त्यावर दरोडेखोरानी दगडी पाट्याने दरवाजा तोडून घरातील कपाटातील ५० हजार रुपये रोख रकमेसह २ लाख ६८ हजार किमतीचे सोन्याचे दागिने असा एकूण ३ लाख १८ हजार रुपये किमतीचा मुद्देमाल दरोडेखोरानी लुटून नेला आहे.