नाट्यगीतांनी रसिक मंत्रमुग्ध

अहमदनगर : वर्ष २०२० हे कोरोनामुळे मैफलीविनाच गेले. वर्षभर कार्यक्रम झाले नसल्याने गायक आणि रसिकांनाही चुकल्यासारखेच वाटले. मात्र, बंदिश सांगितिक प्रतिष्ठानच्या पुढाकाराने नगरमधील सावेडीत नाट्यगीते आणि शास्त्रीय संगीताची मैफल रंगली. यामध्ये रसिक-श्रोते मंत्रमुग्ध झाले.

सावेडीमधील रावसाहेब पटवर्धन स्मारकात बंदिश सांगितिक प्रतिष्ठानच्यावतीने न्यू आर्टस् कॉलेजचे संगीत विभागप्रमुख नीलेश खळीकर यांचा ‘स्वरगंध’ कार्यक्रम पार पडला. यावेळी बंदिश सांगितिक कला प्रतिष्ठानचे अध्यक्ष लक्ष्मण डहाळे, संस्थेचे उपाध्यक्ष अशोक गांधी, सचिव सुमेधा देशपांडे, अविनाश देऊळगावकर, अविनाश बोपर्डीकर, हेमंत काळे, राम शिंदे, अविनाश कुलकर्णी, धनश्री खरवंडीकर आदी उपस्थित होते. कार्यक्रमात प्रारंभी श्रीगणेश, शारदा देवीचे पूजन, दीपप्रज्वलन झाले. हमीरा रागातील ‘चमेली फुली चंपा’ या बंदिशीने मैफलीचा प्रारंभ झाला. विलंबित झुमरा तालातील हा बडा ख्याल व ‘चंचल चपल मदमाती’ या दृत एक तालातील चिजेने सभागृहातील वातावरण भारावले. त्यानंतर बसंत रागातील ‘फुगवा ब्रीज देखन को चलो री’ ही बंदिश बहारदार झाली. भिवाला या रागामध्ये ‘ऋत बसंत सखी अपने उमंग’, ‘फेर आये मोरा अबुना पे’, ‘एरी पिहरवा घर आवो’ या तीन बंदिशी सादर झाल्या. ‘रंधात पेरली मी आषाढ दर्द गाणी व गुंतता हृदय हे’ ही नाट्यपदे रसिकांना आवडली.

राग मांडणीतील कल्पकता, तानेतील स्पष्टपणा व स्वरांचे सच्चेपण ही खळीकर यांच्या गायकीची वैशिष्ट्ये जाणवली. भैरवी रागातील ‘भोला मन जानी’ या निर्गुणी भजनाने या अविस्मरणीय मैफलीची सांगता झाली. या शास्त्रीय गायनाच्या कार्यक्रमाला श्रोत्यांनी भरभरुन दाद दिली. खळीकर यांना मकरंद खरवंडीकर (हार्मोनियम) कल्पेश अदवंत (तबला) तुषार भंडारे व आकाश गाडेकर (तानपुरा) यांनी साथसंगत केली.

सूत्रसंचालन प्रकाश कुलकर्णी यांनी केले तर अनघा पछाडे यांनी कलाकारांचा परिचय करुन दिला. वर्षा पंडित यांनी आभार मानले. या कार्यक्रमात महाराष्ट्र संगीत शिक्षक संघटनेच्या नगर शाखाध्यक्षपदी परशुराम मुळे यांची निवड झाल्याबद्दल व पवन नाईक, लक्ष्मण डहाळे यांची सल्लागारपदी निवड झाल्याबद्दल त्यांचा सत्कार करण्यात आला.

-------

फोटो -२५ बंदिश

सावेडीतील रावसाहेब पटवर्धन स्मारकात बंदिश सांगितिक कला प्रतिष्ठानच्या मैफलीत नीलेश खळीकर यांनी गायन सादर केले. त्यांना मकरंद खरवंडीकर (हार्मोनियम), कल्पेश अदवंत (तबला), तुषार भंडारे व आकाश गाडेकर (तानपुरा) यांनी साथसंगत केली.