रामनामाच्या गजराने साईनगरी दुमदुमली

शिर्डीत रामनवमी उत्सवाची भक्तीमय वातावरणात सुरुवात झाली. आज उत्सवाचा मुख्य दिवस असल्याने साई दर्शनासाठी लाखो भाविकांच्या मांदीयाळीने साईनगरी फुलून गेली आहे.

आॅनलाईन लोकमत
शिर्डी (अहमदनगर), दि़ ४ - शिर्डीत रामनवमी उत्सवाची भक्तीमय वातावरणात सुरुवात झाली. आज उत्सवाचा मुख्य दिवस असल्याने साई दर्शनासाठी लाखो भाविकांच्या मांदीयाळीने साईनगरी फुलून गेली आहे. ‘साईराम बोलो’चा जयघोष करीत शेकडो पायी पालख्या शिर्डीत दाखल झाल्या आहेत. उत्सवासाठी साईबाबा मंदिरावर विद्युत रोषणाई तसेच साई मंदिरात आकर्षक फुलांची सजावट करण्यात आली आहे.
शिर्डीत रामनवमी उत्सवाचा उत्साह शिगेला पोहचला असून भाविकांनी कावडीतून आणलेल्या गोदावरीच्या पाण्याची विधीवत पूजा करून साईमूर्ती आणि साई समाधीला जलाभिषेक करण्यात आला. साईबाबांना मंगलस्नानही कावडीतून आणलेल्या जलाने करण्यात आले. दरम्यान सकाळी काकड आरतीनंतर बाबांची पोथी, विणा आणि प्रतिमेची भव्य शोभायात्रा काढण्यात आली.
आज मध्यान्ह आरती अगोदर साईमंदिरासमोर रामजन्मोत्सव साजरा करण्यात आला. हजारो भाविकांनी राम जन्माचा पाळणा म्हणत मोठ्या भक्तीभावाने राम नामाचा जप केला़ शिडीर्तील रामनवमी उत्सवाच यंदाच हे १०५ वे वर्ष आहे. भाविकांमध्ये साईभेटीचा आनंद ओसंडुन वाहत आहे.
साई समाधी मंदिरासमोर हनुमानांची मूर्ती असलेला ५० फुटी देखावा साकारण्यात आला आहे. हा देखावा भाविकांच लक्ष वेधून घेत आहे. आकर्षक विद्युत रोषणाईने नटलेली महाद्वाराची प्रतिकृति भाविकांच्या आकर्षणाच केंद्रबिंदु ठरली आहे. मुंबई येथील द्वारकामाई मित्र मंडळाने स्वखर्चाने ही प्रतिकृती साकारली आहे. यासाठी प्लास्टर आॅफ पॅरिसचा उपयोग करण्यात आला आहे.
रामनवमी उत्सवात सहभागी होण्यासाठी देशभरातून भाविक येथे येत असतात. शिर्डीचा उत्सव हा भाविकांसाठी आनंद सोहळा असतो. साईबाबांच्या भेटीसाठी आतूर झालेला भक्तगण साई मुर्तीची केवळ एक झलक पाहण्यासाठी अतुरलेला असतो. तिन दिवस चालणाऱ्या या उत्सवातील उर्जा भाविकाला वर्षभर पुरणारी असते. त्यामुळेच हा उत्सव याची देही, याची डोळा अनुभवण्यासाठी लाखोंच्या संख्येने भाविक साई दरबारी दाखल झाले आहेत़ जास्तीत जास्त भाविकांना दर्शनाचा लाभ मिळावा, यासाठी साईमंदिर दर्शनासाठी रात्रभर खुले ठेवण्यात येणार आहे.
आज अनेक भाविकांनी सार्इंना देणग्या दिल्या़ एका भाविकाने ३५ लाख किमतीचे चांदीचे मखर द्वारकामाई मंदिरासाठी दिले़ तर एकाने बारा किलो सोन्याचे कठडे समाधीला बसवले़ एका भाविकाने दोन हजाराच्या नोटांची माळ बाबांना अर्पण केली़ या हाराची किंमत दोन लाख रुपये आहे.