पावसाचे धुमशान.. ३३ टक्क्यांवर पोहोचला कुकडीचा पाणीसाठा

आढळगाव : कुकडी प्रकल्पांतर्गत येणाऱ्या पाच धरणांमध्ये गुरुवारी (दि.२२) दुपारपर्यंत ३३ टक्के पाणीसाठा झाला आहे. धरणांच्या पाणलोट क्षेत्रामध्ये पावसाने दडी मारली होती. परंतु, दोन दिवसांपासून धरणांच्या पश्चिम भागात सह्याद्रीच्या घाटमाथ्यावर पावसाचा जोर वाढला आहे. गेल्यावर्षी याच दिवशी धरणांमध्ये २१ टक्के पाणीसाठा होता. यंदा १० टक्के अधिक पाणीसाठा आहे.

जुन्नर तालुक्यातील येडगाव, माणिकडोह, वडज, पिंपळगाव, तर आंबेगाव तालुक्यातील डिंभे अशी पाच धरणे कुकडी प्रकल्पात येतात. या प्रकल्पाच्या माध्यमातून पुणे जिल्ह्यातील आंबेगाव, जुन्नर, शिरुर व अहमदनगर जिल्ह्यातील पारनेर, श्रीगोंदा, कर्जत तसेच सोलापूर जिल्ह्यातील करमाळा अशा एकूण सात तालुक्यांमधील १ लाख ५६ हजार २७८ हेक्टर एवढे क्षेत्र कालव्यांद्वारे सिंचनाखाली येत आहे. उसाचे आगार ही श्रीगोंदा तालुक्याची ओळख बनविण्यात कुकडीच्या पाण्याचा मोठा वाटा आहे. त्याचबरोबर तालुक्यात कुकडीच्या आधारावर फळबागांचेही क्षेत्र वाढत आहे. त्यामुळे धरणांच्या पाणीसाठ्यावर या भागातील शेतकऱ्यांचे नियोजन अवलंबून असते.

गेल्यावर्षी तालुक्याच्या कुकडी लाभक्षेत्रात पाऊस भरपूर पाऊस झाला होता. तरीही उन्हाळ्यात कुकडीच्या पाण्याने ओढ दिल्यामुळे शेतकऱ्यांच्या उन्हाळी पिकांसह ऊस आणि फळबागा धोक्यात आल्या होत्या. कुकडीच्या पाचही धरणांमध्ये गुरुवारी (दि.२२) दुपारपर्यंत १ हजार ९० दशलक्ष घनफूट आवक झाली होती, तर एकूण ८ हजार ८०० दशलक्ष घनफूट आवक झालेली आहे. आजचा उपयुक्त पाणीसाठा ९ हजार ८९० दशलक्ष घनफूट (३३ टक्के) आहे. गेल्यावर्षी या दिवशी २१ टक्के उपयुक्त पाणीसाठा होता. यावर्षी उपयुक्त पाणीसाठा १० टक्क्यांनी जास्त असला तरीही कुकडी प्रकल्पामध्ये समाधानकारक पाणीसाठ्यासाठी पाणलोट क्षेत्रात पावसाचा जोर कायम राहण्याची गरज आहे.

---

प्रकल्पातील पाणीसाठा..

येडगाव- १, ४४९.०६ दशलक्ष घनफूट (४८.८३ टक्के), माणिकडोह- ३,१०६.९९ (२३.६४ टक्के), वडज- ७३७.७७ (५४.४५ टक्के), डिंभे- ६,८८३.६७ (४७.०९ टक्के), पिंपळगाव जोगे- ३,१७०.८६ (उणे ३२.१२ टक्के).

----------

कुकडी प्रकल्पातील धरणांच्या पाणलोट क्षेत्रात पाऊस सुरू झाल्यामुळे पाणीसाठा वाढत आहे. गुरुवार दुपारपर्यंत ३३ टक्के पाणीसाठा झाला आहे.

-स्वप्निल काळे,

कार्यकारी अभियंता, सिंचन शाखा, श्रीगोंदा.

----

२२ कुकडी

डिंभे जलाशयातील पाणीसाठा.स