मनोरुग्णांना गवसले हरवलेले मन

अहमदनगर : समाजातील उच्चशिक्षण घेतलेल्या अनेक महिला कधी अत्याचाराच्या बळी ठरल्या, तर कोणाची अपेक्षापूर्ती न झाल्याने त्या मनोरुग्ण बनल्या. अशा अनेक महिलांना माउली सेवा प्रतिष्ठाणच्या मनगाव येथील प्रकल्पाने आश्रय दिला आहे. त्यांच्यासाठी डॉ. राजेंद्र व डॉ. सुचेता धामणे माउली बनून काम करीत आहेत. या दाम्पत्याच्या अखंड सेवाव्रतामुळे त्यातील अनेक महिलांचे हरवलेले मन गवसले आहे. अशा महिलांचा सावित्रीबाई फुले यांच्या जयंतीचे औचित्य साधून भुतकरवाडी येथील ओम सुप्रभात ग्रुपतर्फे रविवारी प्रातिनिधिक सत्कार करण्यात आला.

भुतकरवाडी येथील ओम सुप्रभात ग्रुपने सावित्रीबाई फुले जयंतीचे औचित्य साधून रविवारी मनगाव प्रकल्पाला भेट दिली. यावेळी ओम सुप्रभात ग्रुपचे अनिल कटारिया, अविनाश जोशी, बबनरान सुंबे, रवींद्र शिंत्रे, अविनाश झिकरे, बाळासाहेब भगत, संजय मुद्गल आदी उपस्थित होते. सदस्यांतर्फे प्रकल्पासाठी किराणा साहित्य दिले. यावेळी डॉ. राजेंद्र धामणे यांचाही शाळ, श्रीफळ देऊन सत्कार करण्यात आला. समाजात उपेक्षित ठरलेल्या, पीडित असलेल्या, गाव आणि मन हरवलेल्या महिलांना आधार देणारे डॉ. धामणे दाम्पत्य हे महात्मा फुले-सावित्रीबाई फुले यांचेच आधुनिक जगातील सेवारूप आहे, अशी भावना सदस्यांनी व्यक्त केली. मनगाव प्रकल्पात तीनशेपेक्षा जास्त मनोरुग्ण महिला आहेत. डॉ. धामणे यांच्या अखंड सेवेमुळे अनेक महिलांना त्यांचे मन गवसले. अशाच उच्चशिक्षित

मात्र परिस्थितीने मनोरुग्ण बनलेल्या दोन महिलांचा प्रातिनिधिक सत्कार करण्यात आला. त्यातील एका ज्येष्ठ महिलेने

‘असावे आपले घरटे छान’ ही कविता सादर करून उपस्थितांच्या डोळ्यांत पाणी आणले.

यावेळी डॉ. धामणे म्हणाले, मनोरुग्णांना आधार देण्याचे काम हे सर्वसामान्य लोकांच्या मदतीमुळेच शक्य झाले आहे. मनोरुग्णांची वाढती संख्या ही चिंतेची बाब आहे. मनोरुग्णांना आश्रय देण्याचे काम ज्या दिवसापासून कमी होईल, त्याचवेळी समाजाची प्रगती झाली, असे म्हणता येईल. मनोरुग्ण असणे ही एक समस्या झाली. मनोरुग्णांमध्ये अनेक समस्या दडलेल्या आहेत. त्या समस्यांची आधी उकल करून त्या सोडविणे हेच खरे आव्हान आहे. त्या पेलण्याची ताकद समाजाकडूनच मिळते.

--

फोटो- ०३ मनगाव

सावित्रीबाई फुले जयंतीनिमित्त ओम सुप्रभात ग्रुपतर्फे मनगाव प्रकल्पातील दोन महिलांचा सत्कार करण्यात आला. समवेत डॉ. राजेंद्र धामणे, ओम सुप्रभात ग्रुपचे सदस्य, प्रकल्पातील केअर टेकर नीलम लोखंडे आदी.