बाजीराव-मस्तानी चित्रपटाविरुद्ध निदर्शने

अहमदनगर : बाजीराव मस्तानी चित्रपटात बाजीराव यांच्याबद्दल काल्पनिक दृश्ये दाखवून इतिहासाची विकृती केली आहे. या चित्रपटावर बंदी घालण्याच्या मागणीसाठी ब्राम्हण युवा महासंघाने मंगळवारी जिल्हाधिकारी कार्यालयासमोर निदर्शने केली.
याबाबत दिलेल्या निवेदनात युवा संघाचे अध्यक्ष मयूर जोशी यांनी म्हटले आहे की, चित्रपट निर्माते संजय लिला भन्साळी यांचा ‘बाजीराव-मस्तानी’ या चित्रपटामधील बाजीराव पेशवे यांच्याबद्दलचा इतिहास बदलून काल्पनिक घटना दाखविण्यात आल्या आहेत. यामध्ये वास्तव बाजूला ठेवून चित्रपट रंजक करण्याच्या प्रयत्नात इतिहासाचे विकृतीकरण करण्यात आले आहे. मराठेशाहीसाठी पेशव्यांनी दिलेल्या योगदान व पराक्रमाकडे चित्रपटात दुर्लक्ष करण्यात आले आहे. यामुळे बाजीराव पेशवा यांचा अपमान झाल्याने हिंदू समाजाच्या भावना दुखावल्या आहेत. त्यामुळे या चित्रपटावर तातडीने बंदी घालावी किंवा चित्रपटातील आक्षेपार्ह दृश्ये तातडीने काढावीत. अन्यथा नगर शहरामध्ये हा चित्रपट प्रदर्शित झाल्यावर आंदोलन करुन तो बंद पाडण्यात येईल. या आंदोलनात जिल्हाध्यक्ष कन्हैय्या व्यास, कृष्णा जोशी, श्रीनिवास पुणतांबेकर, अ‍ॅड. वैभव उपकारे, किशोर जोशी, जयंत आडकर, सौरभ दंडवते, प्रथमेश देशमुख, देवेंद्र देशमुख, रोहित मुळे आदी उपस्थित होते.
(प्रतिनिधी)