स्नेहालय करणार नगरमध्ये वृक्षारोपण

अहमदनगर : लोकसहभागातून वृक्ष संवर्धनाची चळवळ राबविण्याचे ‘लोकमत’ने जाहीर केल्यानंतर ‘ग्रीन अहमदनगर’साठी स्नेहालय व शिवरुद्रा बहुद्देशिय प्रतिष्ठानने वृक्षारोपण करण्याची तयारी शुक्रवारी दर्शविली़
‘लोकमत’ने सुरू केलेल्या ‘माय सिटी माय ट्री’ अभियानाचे शहरासह जिल्हाभरातून स्वागत होत आहे़ लोकसहभागातून वृक्षारोपणाच्या चळवळीला मोठा प्रतिसाद मिळत आहे़ शहरासह जिल्ह्यातील विविध सामाजिक संस्था व प्रतिष्ठानच्या पदाधिकाऱ्यांनी कार्यालयात दूरध्वनीवरून वृक्षारोपण करून त्याचे जतन करण्याची इच्छा व्यक्त केली़ तारकपूर येथील सेंट झेव्हिअर्स स्कूलसह ग्रामीण भागातील आनंद मुसळे (काष्टी), हर्षवर्धन शेळके (गुंडेवाडी) , विजरेश्वरी (नगर), विकास झरेकर (कामरगाव), मौजे खानापूर ग्रामपंचायत (शेवगाव) आदी ग्रामस्थांनी अभियानात सहभाग नोंदविला़ त्यांनी वृक्षारोपण करून संवर्धन करणार असल्याचा संकल्प केला आहे़
नगर शहरासह जिल्हाभरातून वृक्षारोपण करण्यासाठी शेकडो हात पुढे येत आहेत़ शाळा, महाविद्यालये, धार्मिक स्थळे, सामाजिक संस्था, सहकारी संस्था, मित्र मंडळांनीही वृक्षारोपणासाठी कार्यालयाकडे नोंदणी केली आहे़ ही नोंदणी सुरूच असून, सामाजिक संस्था, शाळा व्यवस्थापन, उद्योजक आदींनी अभियानात सहभाग घ्यावा, असे आवाहन करण्यात आले आहे़
(प्रतिनिधी)
सहभागासाठी संपर्क
विविध संस्थांना वृक्षारोपण करण्याची इच्छा आहे, त्यासाठी दाते हवे असून, अभियानात सहभागी होण्यासाठी कार्यालयात ९१७५५७५७५५ या भ्रमणध्वनीवर संपर्क साधावा़ लोकमत कार्यालयास आपण प्रत्यक्ष भेट देवूनही या अभियानात काही जबाबदारी घेऊ शकता़