हनीट्रॅप करणाऱ्या दोन महिलांसह एक आरोपी जेरबंद

अकोले तालुक्यातील शेती व्यवसाय करणारा एक पुरुष सोशल मीडियाच्या माध्यमातून हनीट्रॅप करणाऱ्या दोन महिलांच्या जाळ्यात अडकला. ११ जून रोजी सदर व्यक्तीला आरोपींनी त्यांच्या संगमनेर येथील फ्लॅटवर बोलाविले. तेथे त्यास धमकी देऊन जबरदस्तीने शरीर संबंध करण्यास भाग पाडले. यावेळी उर्वरित दोघा आरोपींनी त्याचा अश्लील व्हिडिओ बनवून त्यास दोन लाख रुपयांची खंडणी मागितली. पीडित व्यक्तीने पैसे देण्यास नकार दिला तेव्हा आरोपींनी त्यास मारहाण करत व्हिडिओ व्हायरल करण्याची धमकी दिली. त्यानंतर आरोपींना त्याने एटीएममधून काढून ३० हजार रुपये दिले. आरोपींनी उर्वरित १ लाख ७० हजार रुपयांसाठी त्या व्यक्तीकडे तगादा लावला होता. आरोपींचा त्रास असह्य झाल्याने शेवटी पीडित पुरुषाने पोलिसांत धाव घेत घटनाक्रम सांगितला. त्यानंतर पोलिसांना सापळा रचून तिघा आरोपींना जेरबंद केले. जिल्हा पोलीस अधीक्षक मनोज पाटील, अपर पोलीस अधीक्षक दीपाली काळे, उपविभागीय पोलीस अधिकारी राहुल मदने यांच्या मार्गदर्शनाखाली अकोले पोलीस स्टेशनचे सहायक पोलीस निरीक्षक मिथुन घुगे यांच्या पथकाने ही कारवाई केली आहे.

--------------------

असे केले आरोपींना जेरबंद

पीडित पुरुषाने तक्रार केल्यानंतर आरोपींना रंगेहात जेरबंद करण्यासाठी पोलिसांनी सापळा रचला. यासाठी पोलिसांनी पिडित व्यक्तीकडे १० हजार रुपये दिले. आरोपींचा पैशांसाठी या व्यक्तीकडे तगादा सुरूच होता. पैसे घेण्यासाठी आरोपींना अकोले तालुक्यातील सुगाव फाटा येथे बोलाविले. पैसे घेण्यासाठी संगमनेर येथून एक महिला व पुरुष आले. पैसे घेत असतानाच सापळा लावून बसलेल्या पोलिसांनी त्यांना जेरबंद केले.

--------------

आरोपींनी अनेकांना ब्लॅकमेल केल्याची शक्यता

पोलिसांनी अटक केलेल्या तिघा आरोपींनी अशाच पद्धतीने अनेकांना ब्लॅकमेल करून पैसे उकळल्याची शक्यता आहे. त्यामुळे फसवणूक झालेल्या लोकांनी न घाबरता तक्रार द्यावी, असे अवाहन पोलिसांनी केले आहे. दरम्यान या गुन्ह्यात आणखी आरोपी वाढण्याची शक्यता तपासी अधिकारी मिथुन घुगे यांनी वर्तविली आहे.