युपीएससीत नगरकरांचा झेंडा

विनायक कारभारी नरवडे हा नगर येथील सावेडीतील असून, त्याचे प्राथमिक शिक्षण आठरे पाटील स्कूलमध्ये, तर महाविद्यालयीन शिक्षण सारडा महाविद्यालयात पूर्ण झाले. पुढे पुणे येथून अभियांत्रिकीच्या पदवीचे शिक्षण घेऊन त्याने अमेरिकेत पदव्युत्तर पदवी पूर्ण केली व काही काळ नोकरीही केली. परंतु आयएएस अधिकारी होण्याचे त्याचे स्वप्न होते. त्यामुळे अभ्यासासाठी नोकरीवर पाणी सोडून तो पुन्हा मायदेशी परतला. दोन वर्षे अभ्यास केल्यानंतर पहिल्या प्रयत्नात अपयश आले. मात्र यंदाच्या परीक्षेत त्याने अखेर यशाला गवसणी घातली. विनायकने देशात ३७ वी रँक पटकावली असून, राज्यात तो दुसऱ्या क्रमांकावर आहे. विनायकचे वडील व बहीण डाॅक्टर असून, आई गृहिणी आहे. आपण केलेल्या कष्टाचे हे चीज असून, कुटुंबीयांच्या मार्गदर्शनामुळे हे यश मिळाल्याचे विनायकने सांगितले.

अभिषेक दिलीप दुधाळ याने युपीएससी परीक्षेत सलग दुसऱ्यांदा यश मिळविले आहे. अभिषेक हा बेलापूर (ता. श्रीरामपूर) येथील असून, त्याला ४६९ वी रँक मिळाली आहे. अभिषेकचे वडील दिलीप दुधाळ हे शिक्षक, तर आई संगीता गृहिणी आहेत.

विकास बाळासाहेब पालवे हा मूळ सोनई (ता. नेवासा) येथील असून, त्याने ५८७ वी रँक मिळवली. गेल्या चार वर्षांपासून तो युपीएससीची तयारी करीत होता. त्याचे वडील बाळासाहेब पालवे हे शिक्षक, तर आई शोभा या गृहिणी आहेत.

------------------

सूरजचे पहिल्याच प्रयत्नात यश

सूरज गुंजाळ याने पहिल्याच प्रयत्नात यश मिळविले. त्याचे प्राथमिक शिक्षण नवनागापूर येथील गजानन कॉलनीतील जिल्हा परिषद प्राथमिक शाळेत, माध्यमिक शिक्षण वडगाव गुप्ता येथील ज्ञानसरिता विद्यालयात, तर महाविद्यालयीन शिक्षण सारडा कॉलेज येथे झाले. पुढे पुण्यातील सिंहगड कॉलेजमधून त्याने अभियांत्रिकीची पदवी पूर्ण केली. मागील दोन वर्षांपासून तो केंद्रीय लोकसेवा आयाेगाच्या परीक्षेची तयारी करत होता. त्याचे वडील नगर एमआयडीसीतील एका कंपनीत कर्मचारी आहेत, तर आई गृहिणी आहे.

-----

शिक्षकाच्या मुलाचे यश

शेवगाव तालुक्यातील चापडगाव येथील सुहास गाडे याने प्राथमिक शिक्षण चापडगाव येथून, माध्यमिक शिक्षण टाकळी ढोकेश्वरच्या नवोदय विद्यालयातून, तर नांदेड येथून कॉम्प्युटर सायन्सची पदवी मिळविली. त्याचे वडील आबासाहेब काकडे विद्यालयात शिक्षक असून, आई गृहिणी आहे. सूरजने पहिल्याच प्रयत्नात युपीएससीत यश मिळविले.

---------

फोटो - २४विनायक नरवडे, सूरज गुंजाळ, सुहास गाडे, अभिषेक दुधाळ, विकास पालवे