मनपा आयुक्त शंकर गोरे यांनी पदभार स्वीकारला

अहमदनगर : अहमदनगर महापालिकेच्या आयुक्तपदाचा शंकर गोरे यांनी गुरुवारी पदभार स्वीकारला. गोरे यांच्या रूपाने महापालिकेला पूर्णवेळ आयुक्त मिळाले आहेत. त्यामुळे महापालिकेच्या कारभाराला गती मिळण्यास मदत होणार आहे.

महानगरपालिकेचे तत्कालीन आयुक्त श्रीकांत मायकलवार हे ३१ डिसेंबर रोजी सेवानिवृत्त झाले. तेव्हापासून जिल्हाधिकारी राजेंद्र भोसले यांच्याकडे आयुक्तपदाचा पदभार होता. अधिकारी भोसले यांनी दीड महिना महापालिकेचा कारभार पाहिला. महापालिकेला पूर्णवेळ आयुक्त नसल्याने अनेक कामे थांबली होती. जळगाव जिल्ह्यातील चाळीसगाव नगर परिषदेचे मुख्य कार्यकारी अधिकारी शंकर गोरे यांची १२ फेब्रुवारी रोजी पदोन्नतीने अहमदनगर महापालिकेच्या आयुक्तपदी बदली झाली. नगरविकासमंत्री एकनाथ शिंदे हे नगर दौऱ्यावर असताना त्यांनी गोरे हे महापालिकेला नवीन आयुक्त मिळाले असल्याची माहिती दिली होती. परंतु गोरे घरगुती कारणामुळे महापालिकेत रुजू झाले नव्हते. त्यांनी गुरुवारी पदभार स्वीकारला. गोरे यांनी यापूर्वी सातारा, चाळीसगाव नगर परिषदेमध्ये मुख्य कार्यकारी अधिकारी म्हणून काम पाहिलेले आहे. महापालिकेचा कारभार गोरे यांच्यासाठी नवीन आहे. यापूर्वी त्यांनी आयुक्त म्हणून काम पाहिलेले नाही. ते प्रथमच अहमदनगर महापालिकेत आयुक्त म्हणून रुजू झाले आहेत.

....

नगर शहराचा अभ्यास करून विकासकामांचे नियोजन केले जाईल. विभागप्रमुखांची एकत्रित बैठक सायंकाळी बोलाविण्यात आलेली आहे. सर्व विभागांची माहिती घेऊन जी कामे थांबलेली आहेत, ती पूर्ण करण्यासाठी प्रयत्न केला जाईल.

-शंकर गोरे, आयुक्त, महापालिका

....

अधिकाऱ्यांची ओळख परेड

महापालिका आयुक्तपदाचा पदभार स्वीकारल्यानंतर गोरे यांनी चार वाजता पाणीपुरवठा, बांधकाम, आरोग्य आदी सर्व विभागांतील विभागप्रमुखांची ओळख करून घेऊन कामकाजाची माहिती घेतली आणि काही सूचनाही केल्या.