दत्तकृपा कोविड सेंटरमुळे वाचले अनेकांचे प्राण

करंजी : कोरोना संकटाची चाहूल लागताच पाथर्डी तालुक्यातील मिरी येथील ग्रामस्थांनी एकत्र येऊन लोकसहभागातून दत्तकृपा कोविड सेंटर सुरू केले. या कोविड सेंटरमुळे मिरी-करंजी परिसरातील शेकडो कोरोनाबाधितांचे प्राण वाचले.

कोरोनाच्या दुसऱ्या लाटेत मिरी-करंजी परिसरात मोठ्या प्रमाणावर रुग्ण आढळून येत होते. परिसरातील लहान-मोठ्या गावांत शेकडो ग्रामस्थ बाधित होत होते. अशा रुग्णांना नगर व शहर परिसरात उपचारासाठी जावे लागत होते. तेथे काहींना बेड मिळत नसत किंवा वेळेत उपचार मिळत नसत. त्यामुळे काही ग्रामस्थांचा मृत्यूही झाला. रुग्णांची संख्याही वाढू लागली होती. त्यानंतर मिरी ग्रामस्थांनी लोकवर्गणीतून दत्तकृपा कोविड सेंटर उभे केले.

कोरोना रुग्णांची नि:स्वार्थ सेवा होत असल्याचे पाहून मिरी परिसरातील ग्रामस्थांसह अनेक दानशूर व्यक्तींनी मोठी मदत केली. गावात घराघरांतून पलंग व बाजांची मागणी करण्यात आली. आजही या कोविड सेंटरमध्ये परिसरातील पन्नासहून अधिक रुग्ण उपचार घेत आहेत. येथील कोविड सेंटरला राज्यमंत्री प्राजक्त तनपुरे यांच्यासह प्रांताधिकारी, गटविकास अधिकाऱ्यांसह अनेक अधिकाऱ्यांनी भेटी दिल्या.

राजकारण करता-करता आपण समाजाचे काही देणे लागतो ही भावना ठेवून अनेक लहान-मोठे कार्यकर्ते कोरोनाच्या संकटात असताना समाजाची सेवा करीत आहेत. मिरी पंचायत समिती सदस्य राहुल गवळी ग्रामस्थांच्या मदतीने अहोरात्र रुग्णांची सेवा करत आहेत. या कोविड सेंटरमुळे मिरी - करंजी परिसरातील खेड्या-पाड्यापासून ते वाड्या- वस्त्यांना विळखा घालून बसलेल्या कोरोनाला रोखण्यात काही प्रमाणात का होईना यश आले आहे. त्यामुळेच परिसरातील रुग्णांची संख्या कमी होण्यास मदतच झाली नव्हे तर परिसरातील रुग्णांची गैरसोय टळून अनेकांचे प्राण वाचले.

--

राजकारण करताना आपण समाजाचे काही तरी देणे लागतो याचे भान लहान-मोठ्या कार्यकर्त्यांनी ठेवल्यास समाजावर कितीही मोठे संकट आले तरी दूर करता येते. त्यामुळे मी स्वतः ग्रामस्थांसह येथील रुग्णांची देखभाल करतो.

-राहुल गवळी,

सदस्य, पंचायत समिती, पाथर्डी

---

०२ मिरी कोविड सेंटर

मिरी येथील दत्तकृपा कोविड सेंटरमधील रूग्णांची पाहणी करताना राहुल गवळी व इतर.