जामखेडमध्ये मुख्याधिकारी वसुलीसाठी मैदानात

जामखेड : नगरपरिषद हद्दीतील व्यावसायिक व रहिवासी यांच्याकडे मालमत्ता करापोटी साडेआठ कोटी थकीत आहेत. अनेक गाळेधारकांनी आठ ते दहा वर्षे भाडेही भरले नाही. त्यांच्या वसुलीसाठी मुख्याधिकारी मिनिनाथ दंडवते हे वसुली पथकासह मैदानात उतरले. ते थेट दुकाने सील करीत असल्याने गाळेधारकांनी पैसे जमा करण्यास सुरुवात केली आहे. आठ ते दहा गाळे सील केले आहेत. दोन दिवसांपासून करवसुलीच्या धडक मोहिमेत पाच लाख अकरा हजार रुपयांचा वसूल झाला आहे.

नगरपरिषदेच्या हद्दीतील व्यावसायिक गाळेधारकांकडे आठ ते नऊ वर्षांपासूनचे भाडे थकीत होते. एका एका गाळेधारकाकडे साठ ते सत्तर हजार रुपये थकीत होते. कधीही कर भरलेला नव्हता. या सर्व गाळेधारकांना नोटिसा पाठविल्या. जे भरणार नाहीत, असे गाळे सील करण्यास सुरुवात केली. त्यामुळे गाळेधारकांनी थकीत भाडे भरण्यासाठी सुरुवात केली.

याबाबत मिनिनाथ दंडवते म्हणाले, नगरपरिषद हद्दीतील व्यावसायिक व घरगुती अशी मोठी थकबाकी आहे. त्यामुळे सेवा सुविधा उपलब्ध करून देण्यात अडचणी निर्माण होतात. सर्व नागरिकांनी आपापली थकबाकी भरावी. त्यामुळे सर्वसामान्य नागरिकांना सेवासुविधा उपलब्ध करून देणे सुलभ होईल. कररूपाने गोळा होणारा पैसा सेवा-सुविधा उपलब्ध करून देण्यासाठी वापरला जातो. सर्व हिशोब नगरपरिषद कार्यालयात असेल. तेव्हा थकबाकीधारकांनी ताबडतोब आपापली थकबाकी भरावी.

वसुली पथकात विष्णू भिसे, रामराव नवगिरे, राजेंद्र गायकवाड, अविनाश साबळे, सिद्धेश मुळे, अतुल कोकाटे, अभिजित भैसाडे, प्रमोद टेकाळे, लक्ष्मण माने, निवृत्ती चव्हाण, विजय पवार, संजय खेत्रे, उमेश राऊत, हितेश वीर, रज्जाक शेख, राम नेटके,संतोष अडाले, सय्यद वली, ऐयाज शेख कर्मचारी आहेत.