समाजसेवी युवकाची आंतरराष्ट्रीय पातळीवर दखल

साईश विनोद गोंदकर, असे या दहावीत शिक्षण घेणाऱ्या युवकाचे नाव आहे. त्याने सुरू केलेल्या नीड फॉर नीडी चळवळीची दखल घेऊन साईशच्या कार्याची दखल लंडन येथील वर्ल्ड बुक ऑफ रेकॉर्ड यांनी घेतली आहे. शनिवारी जेऊर कुंभारी येथील रेन्बो इंटरनॅशनल स्कूलमध्ये त्याला वर्ल्ड बुक ऑफ रेकॉर्ड लंडन सर्टिफिकेट फॉर कमिटमेंट देऊन गौरविण्यात आले. वर्ल्ड बुक ऑफ रेकॉर्डचे समन्वयक महेश वैद्य व सदस्य मनीषा वैद्य यांच्या हस्ते हे सन्मानपत्र बहाल करण्यात आले. यावेळी रेन्बो इंटरनॅशनलचे पदाधिकारी संजय नागरे, आनंद दगडे, आकाश नागरे, प्राचार्या शैला झुंजारराव, उपप्राचार्य सोमनाथ सोनवणे, सागर कुलकर्णी, विनोद गोंदकर, रेश्मा गोंदकर, ग्रीन न क्लीन शिर्डीचे अजित पारख, चित्रकार हेमंत वाणी, कैलास ढमाले यांची उपस्थिती होती.

साईशने गेल्या वर्षभरात घरोघरी जाऊन कपडे, शालेय साहित्य व औषधी गोळा करून ती गरजू विद्यार्थी व कष्टकरी मुलांपर्यंत पोहोचवली. यात शिर्डीच्या पंचक्रोशीतील वीटभट्टीवरील मुले, ऊसतोडणी कामगारांची मुले, रेल्वे रुळाच्या बाजूला राहणारी मुले यांचा समावेश आहे. साईशने त्याच्याकडे जमा झालेली औषधी सावळेविहीर, अस्तगाव, राहाता, दाढ, पुणतांबा, वाकडी, लोणी येथील शासकीय रुग्णालयात देऊन तेथील डॉक्टरांच्या मदतीने गरजू व गोरगरीब रुग्णांपर्यंत पोहोचवली. साईशच्या या समाजसेवेत शिर्डीतील नागरिकांबरोबरच त्याचे अमेरिका व कॅनडातील मित्रांनीही औषधे व साहित्याची मदत केली.